Kalaallit Nunaat Tivolimi akissaqarluarpoq

Kalaallit 32-ssaannik Tivolimi naapinnissaanut piareersaatit naammassilivipput. Nipilersoriaatsit assigiinngitsut aatsaat taama amerlatigisut tusarnaarneqarsinnaassallutik. Qaannamik kinngusaqattaartoqassaaq ullut pingasut, julip 30-niit aggustip aallaqqaataa ilanngullugu.

Peqatigiiffimmi ”Kalaallit Nunaat Tivolimi” siulittaasoq Sidsel Møller nuannaarpoq, ukioq manna kissaatigisatik tamakkerlugit akissaqartikkamikkit.

Siullermeerluta aatsaat pilersaaruterput kissaatigisatsinnik tamanik imalik ingerlatissavarput.

Pilersaarusioraangatta marlunnik pilersaarusiortarpugut, siulleq kissaatigisanik tamanik imalik, aappaa akissaqassuserput tunngavigalugu ingerlatassaq.

- Nuannaarutigaaralu ukiormanna pilersaarut siulleq ingerlatissagatsigu, Sidsel Møller Ny Carlsbergvejimi angerlarsimaffiani, Københavnip qeqqarluinnaaniittumi iserfigiganni oqarpoq.

Nipilersoriaatsit assigiinngitsut ukioq manna naapititsinissami aatsaat taama amerlatigisut tusarnaarneqarsinnaassapput.

Siullermeerluni bluesimik, nipilersugassiarsuarnillu tusarnaartoqarsinnaassaaq, aamma rappertartunik akersuuttoqassalluni.

Qaannamik Tivolip tasiani kinngusaqattaartoqassaaq, takutitsineq ullormut arlaleriarluni ingerlanneqartartussaq tupaallaatissaasoq Sidsel Møller oqarpoq.

-Naak siornatigut ingerlanneqartareeraluartoq, ukioq manna tupaallannartoqassaaq, Sidsel Møller suli qaannamik takutitsinissamut tunngasumik isertulaarallarusuttoq oqarpoq. Silamullu sangupallappoq:

-Ukioq kingulleq siallersorsuugaluaq Poul Dissing appisimaarpoq, Zikaza-kullu appimmata siallerunnaarpoq.

Ukioq manna Ole Kristiansen pingaarnertut appisimaartinneqassaaq, neriuppugullu sialleraluarpalluunniit inuit nipilersullammammut tusarnaariassasut.

Ukioq kingulleq Tivolimi ulluni pingasuni naapitsitsinermi inuit 80 tusindit Tivolimut isersimapput, Tivolillu kisitsisaatai naapertoraanni ulluni taakkunani inuit pingasuugaangata marluk naapititsinermukartuusarsimavoq. Tivolimut aningaasaliissutit katillugit 600.000 koruuniupput.