Kalaallit Nunaat nunat pinerluttuliorfiunerpaasut ilagaat

Nunatsinni pinerluuteqarsimasunut inissiisarfinni inissaaleqineq nassuiaatissaqarluarpoq. Nunamimi innuttaasut qanoq amerlatigisut parnaarussivimmiinnerinut allattorsimaffimmi Nunarput qaffasissumik inissisimavoq. Innuttaasut 100.000-t tunngavigalugit naatsorsuinermi kitsisit 340-voq, Nunarpullu taamaasilluni nunanit 223-iusunit allattorsimaffimmi normu 24-tut inissisimavoq.

Nunat tamat Parnaarussiviit pillugit Ilisimatusarfik Tuluit Nunaanniittoq taamatut naatsorsuisuuvoq. Nuna innuttaasuminik parnaarussivimmiittuuteqarnerpaasoq tassaavoq USA, Nunatsinnut naleqqiullugu marloriaammik parnaarussiviimmiittoqarnerulluni. Danmark allattorimaffimmi normu 178-itut inissisimavoq.

Arnanut parnaarussivimmiittunut tunngatillugu aamma Nunarput qaffasissumik inissisimavoq. Arnat parnaarussivinniittut 11,3 procentiupput, Nunarpullu allattorsimaffimmi normu 12-itut inissisimalluni. Mopnacoli qaangerneqarsinnaagunanngilaq, tassanimi parnaarussat pingasuugaangata ataaseq arnaasarpoq.

Kisitsisitigut paasissutissani aamma atuarneqarsinnaavoq Haitimi parnaarussiviit inissaaleqiffiunerpaasut, inissat 337%-inik sipporneqarsimallutik.

Kisitsisilli mianersuutassaapput, Kalaallit Nunaannummi tunngatillugit 2009-meersuummata.