Futsal: Kalaallit Nunaat Nordic Cupimi pingasunik pointinnappoq

Unamminerni tamani ajugaanissaq anguniagaanngitsoq, nunanulli allanut unammisartut ilaatigut akissarsiutigalugu unammissagaanni tamatuma sutigut pisariaqartitsineranik ilinniarnissaannik siunertaqartoq, nunanut allanut unammisartut sungiusaasuat KNR-imut siornatigut taama oqarpoq.

Unamminermi siullermi Kalaallit Nunaat Finlandimut 6-4-mik ajorsarpoq. Kalaallit Nunaat unamminerup immikkoortuani siullermi ingerlanerliorpoq kukkuluttortoqarneralu målertoqarneranik kinguneqarluni. Kalaallit Nunaat unamminerup immikkoortuata aappaani ingerlalluarpoq sisamanik isertitaqarluni, tamannali pointinnannissamut naammanngitsoq, GBU Facebookimi taama allappoq. Finland nunarsuarmi futsalimik arsartartut pikkorinnerit allattorsimaffianni normu 40-tut inissisimavoq. 

Kalaallit Nunaata Norge 4-3-mik ajugaaffigaa. Norge nunarsuarmi futsalimik arsartartut pikkorinnerit allattorsimaffianni normu 66-iuvoq. Unammineq taanna pissanganarluinnartumik naammaassineqarpoq. Unamminerup soraarnissaanut minutsit marluinnanngortut 2-2-mik inissisimapput, taava Niklas Thorleifsen isertitsivoq Kalaallit Nunaallu 4-3-mik siuaqqalerluni. Ajugaanerullu Kalaallit Nunaannut pingaaruteqarluinnarnera ersarippoq. Arsartartut 4-3-mik ajugaanertik nuannassutigalugu mannequin challengemik taaneqartartumik takutitsisut ataani takuneqarsinnaapput:

Danmark akiniaasoq

Kalaallit Nunaata pingajussaanik unamminermini Danmark siornatulli ajugaaffiginngitsoorpaa. 

Danmark pitsaanerungaatsiarpoq 7-2-millu ajugaalluni. Danmark nunarsuarmi futsalimik arsartartut pikkorinnerit allattorsimaffianni normu 69-itut inissisimavoq. 

Kalaallit Nunaata unamminermini kingullermi Sverigemut, allattorsimaffimmi normu 63-itut inissisimasumut, isertitaqanngitsoorpoq. Sverige 5-0-imik ajugaavoq.

Nunanut allanut unammisartut assingi GBU-p Facebookimi quppernerani takukkit.