Kalaallit Nunaat maleruagassanik unioqqutitsinerarpaat
Radioaviisimi Qanoruumilu oqaatigineqareersutut, meeqqat 15-nik ukiullit napparsimasut kisimiitillugit Nuummut Københavnimullu napparsimavinnukartinneqartarput, tassa meeraq 15-nik ukioqalereersimagaangat angajoqqaavisa angalanissaminnut aningaasartuutaat Namminersornerullutik Oqartussanit akilerneqarneq ajormata.
Taamatullu periuseqarneq nunat tamat akornini maleruagassanik unioqqutitsineruvoq, Dronning Ingridip napparsimavissuani meeqqanut nakorsaq Britta Olsen oqarpoq, Nunanilu Avannarlerni Meeqqat Napparsimasut Pisariaqartitaat Pillugit Peqatigiiffiup, NOBAB-ip meeqqat napparsimasut pillugit naliginnartut maleruaqqusaat, Naalagaffiit Peqatigiiffianni, FN-imi meeqqat pillugit nunat tamat isumaqatigiissutaanni akuerineqarsimasoq.
NOBAB naapertorlugu meeqqat napparsimanertik tamaat angajoqqaaminnit ilaquttaminnilluunniit qanigisaminnit najorneqatussaapput, angajoqqaallu saniatigut aningaasartuuteqassanatik aningaasarsiaminnilluunniit ilanngaaffigineqassanngillat.
Taamaalilluni Kalaallit Nunaanni 15-inik ukioqalereersimasut kisimiisillugit angatinneqartarnerat maleruagassanik taariikkatsinnik unioqqutitsineruvoq, meeqqat nakorsaat, Britta Olsen oqarpoq.
Periuseq taanna allanngortinneqassappat akisussaqaaq, napparsimasullu nunatsinni katsorsarneqartarnerannut sunniuteqapilussinnaalluni.
Nuummi Dronning Ingridip Napparsimmavissuani pisortap, Jens Møller Jensenip, tamanna aarlerinartoqartippaa.
Ullumi periuserineqartartut allanngortinneqassappata aningaasartuutissatullu aalajangerneqarsimasut nikisinneqaratik, taava aningaasat ullumikkut katsorsaanernut atortakkatsinniit tigusariaqassavavut. Angajoqqaat angalanerinut aningaasartuutit Peqqinnissaqarfimmut aningaasartuutissatut atugassiissutigineqartartut iluini matussuserneqassappata, tassanngaannarlu napparsimalertartunut anigaasartuutigisartakkat nikisissinnaanatigit, taava katsorsartinnissaminnut utaqqisut suli amerlanerulertariaqalissapput.
