Kalaallit Nunaat kiannerulissaaq
- Qanorluunniit iliuuseqartoqaraluarpat ukiut hunnorujut tulliuttut ingerlanerani Kalaallit Nunaanni sila 5 gradinik kiatsinerussaaq, ilisimatuussutsikkut misissuisartoq Dorthe Dahl Jensen Nunanit Tamanit Issittumut ukiorititaq pillugu Ilimmarfimmi sapaatip-akunnerata naanerani isumasioqatigiinnermi taamatut saqqummiivoq.
- Qangarsuaq silap pissusaanik paasisinnaasavut naapertorlugit sila kiatsikkiartuinnarpat sermersuup 30 procentia aassaaq, imarlu 5 meterinik qaffassalluni. Taamaalillunilu sissamut qanittumi najugallit ulorianartorsiulersinnaallutik.
- Ullumikkullu nalunngilarput nunarsuatsinni piitsuunerpaat sissamut qanittumi najugaqakkajunnerusut. Taamaalilluta oqarsinnaavugut, naalagaaffiit pisuut siuarsimasutullu taasartakkavut avatangiisiminnik mingutsitsillutik pisuunngoriartorsimanerat pissutaalluni, silap pissusaa allanngoriartoraluartoq, piitsuunerusut - mingutsitsinerup kingunipiluinik eqqugaanerpaassapput. Taamaammat nunarsuarmioqatigiit suleqatigiillutik silap pissusaata allanngoriartornerata kingunerisassaannut naalagaaffiit pitsuunerit ikiorniartariaqaraat isumaqarpunga, ilisimatooq Dorthe Dahl Jensen oqarpoq.
Dorthe Dahl Jensenip suleqataaffigisaa, ataqatigiissaakkatut suliniut taaguuteqarpoq, NEEM. Suliariniakkami NEEM-imi 2011-ip tungaanut ingerlanneqartussami kalaallit ilisimatusartut assassornikkullu suliaqartut assigiinngitsut suleqatiserineqarput.
