Kalaallit Nunaat imminut napatissinnaalersinnaavoq

Kalaallit Nunaat ukiut qulit 20-it qaangiuppata imminut nappassinnaalersinnaavoq. Kisianni taamaalissagaanni, niuernermi periutsinut naleqqussaqqaartariaqarpoq. Århusip Universitetiani aningaasaqarnermut professori Martin Paldam, taama oqarpoq.
novembarip 11-at 2008 17:54

- Ilungersorluni sukataaraanni ukiut qulit 20-illu akornanni qaangiuppata tamanna ajornassanngitsoq eqqoriarsinnaavara.

Aningaasarsiornermi professorip Martin Paldamip Kalaallit Nunaata imminut nappassinnaasumik ingerlatsilersinnaanerata ilimanaataa oqaatigaa.

Kisianni tassa tamanna anguniaraanni politikikkut sukannerluinnarluni pingaarnersiuisoqartariaqassaaq.

- Kalaallit Nunaat imminut napatissappat aningaasarsiorneq niuernermi periutsinut naleqqussartariaqarpoq. Tassa tunisassianik tunineqarsinnaasunik tunisassulertariaqarput nunarsuarmilu niuertunut unammilersinnalertaqarluni.

Takornariartitsisartut ineriartortariaqarput, taamaammallu akit apparujussuarneqartariaqarlutik. Suliffeqarfiit imminnut akilersinnaasariaqarput, akilersinnaanngitsullu matuneqartariaqarput. Allannguinissaq peqqarniikkaluaqaaq, Paldam oqarpoq.

Kisianni peqqarniitsumik pissuseqarluni pingaarnersiuinissaq suli takussaanngitsoq, Martin Paldam isumaqarpoq. Aammami imminut nappatilernissamut piukkunnarsarluni allannguinissanut pisariaqartunut Kalaallit Nunaanni politikerit piareersimanersut qularutigaa.

- Piareersimasoqarnersoq ilimaginngilara, kisianni piareersimalersinnaapput. Nunat allarpassuit allannguinikuupput. Nunani allarpassuarni naleqqussartoqarsinnaappat, taava sooq Kalaallit Nunaanni allannguisoqarsinnaassanngila? Aningaasarsiornermut professori Århus-imeersoq Martin Paldam aperaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq