Kalaallit Nunaat eqqaaneqaraangat Jonathan Motzfeldt eqqaaneqartarpoq

Ukiut kingulliit 40-t Kalaallit Nunaat assilineqarsinnaanngilaq Juuntaat assilissap qeqqaniitinnagu, taama oqarpoq danskit nunanut allanut ministererisimasaat, aningaasaqarnermut ministeriusimasoq, folketingimut ilaasortaq socialdemokraaterlu, Mogens Lykketoft, taassuma Juuntaaq qanimut suleqatigisimavaa.

- Assut ilikkagaqarfigilluarpara, inuugami qallunaat oqariaasiat malillugu kikkut tamaasa oqaloqatigisinnaallugit træskoqaraluarluni. Tassami apeqqutaanngilaq aalisartoq piniartorluunniit imaluunniit præsidenti paviluunniit oqaluukkunigit, tamaasa sapinngilai.

Mogens Lykketoft aamma Jonathan Motzfeldt ukiut ingerlaneranni Danmarkimi Nunatsinnilu naapittarput. Naapittarnerminni puigugassarinngisami ilaannik Lykketoft eqqaamasaqarpoq.

- Københavnimi Nuummilu nuannersunik oqaloqatigiittarpugut isumaqatiginninniarlutalu, kisianni tassa Nuummi ingerlanneqaraangata nuannernerpaasarpoq, umiatsiarnernik aalisariarnernillu akunnilertaratsigit, Lykketoft oqarpoq.

Lykketoft ikinngutitut maani Nuummi ilisaaneranut peqataavoq.

- Aamma uagut ilaqutariinni pituttorneqaatigivarput nuliama mikisunnguulluniilu ilisarisimagamiuk. Juntaat nuliama angajoqqaavisa pensionatianut isertarmat, juullisioqatigisarlugillu, tassani juullip iivangiiliua atuartarlugu.

Ukiuni 25-ni ikinngutigiinnerminni Mogens Lykketoft ataatsimik eqqaamanerpaasaqarpoq.

- Ukiut tallimat matuma siorna nuliaralu katikkatta Juuntaap katitippaatigut, tamannalu pivoq maanni Kalaallit Nunaanni. Juuntaap uannut iluusaanut tamanna pingaaerpaasutut oqaatigisinnaavara. Lykketoft naggasiivoq.