Kalaallit Nunaat Chile-mut ajorsarpoq

Amerikap nunavittaani assammik arsarluni unammersuarnerni, VM-imut anngunniuffiusuni, Kalaallit Nunaat ippassaq Chilemut unamminermi 28-31-imik ajorsarpoq.
Allattoq Louise M. Kleemann
juunip 26-at 2008 07:33

Sungiusaasup Jakob Andreasenip oqarnera naapertorlugu angutit arsarnerat ippassaani Canadamiunut arsarnermit Chilemiunut ippassaq arsarnerat pitsaaneruvoq. Pingaartumillu unamminerup immikkoortuata aappaani Minik Dahl-Høegh arsarluarnerarpaa, taannami aamma målernerpaalluni aqqaneq-marlunnik isertitaqarpoq.

-Arsartut ajorsarnertik assut ajuusaarutigivaat, kisianni aamma unammineq sioqqullugu piareersarsinnaasimannginneq eqqarsaatigalugu, 28-31-imik angusaat naammaginartoq, sungiusaasuata oqaatigaa.

Kalaallit ullumi nalunaaqutaq tappavani sisamanut maani nunatsinni tallimanut ajugaasussatut ilimagisanut Argentina-meersunut unammissapput, radiokkut toqqaannartumik aallakaatinneqartussamik.

Kalaallit Nunaat Argentinamut ajugaassaguni semifinalinut anngussinnaavoq, taamaassappat aamma pulje-qataanni Canada Chile-mut ajugaasariaqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq