Kalaallit Nunaat aningaasassaaleqissaaq

Ilinniartitaanikkut qaffariarneq inuiaqatigiinnilu allannguinissaq aqqussaarneqassapput, Kalaallit Nunaat imminut napatinnerusoq aningaasarsiornikkullu patajaatsumik politikkimik ingerlatsisoq piviusunngussappat. Ilaatigut tamakku saqqummiunneqarput Aningaasaqarnikkut ingerlatsineq pillugu nalunaarusiami, naalakkersuisut ippassaq saqqummiussaanni.

Aningaasaqarnikkut ingerlatsineq pillugu nalunaarusiaq saqqummiuneqartoq nutaartaqarpianngilaq. Akileraartarnermut atugarissaarnermullu ataatsimiititaliap siorna oqallisissiaanit pisuupput. Nalunaarusiap inernera sapaatip akunnerani kingullermi saqqummiunneqarpoq.

Inuiaqatigiinni atugarissaarnerup ingerlaannarnissaa aalajangiusimaneqarpoq, tamannalu pillugu aningaasat 1 milliardi koruunit ukiumut nassaarineqartariaqarlutik sipaaruteqarnikkut isertitatigulluuunniit.

Aningaasaqarnikkut ingerlatsineq pillugu nalunaarusiami taamatut allassimasoqarpoq, imatullu nanginneqarluni:

- Tamatuma nassatarisaanik Kalaallit Nunaanni innuttaasut inuiaqatigiinni atugarissaarfiusuni iluaquteqarsinnaanerat kisimi qulakkeerneqassanngilaq, kisianni aamma ikiuutissapput. Tamanna tunngaviusumik inuiaqatigiinni pisussaaffiuvoq, nalunaarusiami tamanna erseqqissarneqarpoq.

Aningaasaqarnermut Naalakkersuisutut ivertinneqaqqammersup Maliina Abelsenip naluaarusiami aallaqqaasiussami allannguisoqartariaqartoq oqaatigaa.

Aningaasaqarnikkut imminut napatissinnaasumik ineriartortitsissagaanni sulisinnaasut pitsaanerusumik ilinniagaqarsimanissaat aaqqissuussaanikkullu allannguisoqarnissaa pisaria­qar­poq.

Peqatigisaanik suliffeqarfinnik ingerlatsinissamut kajungilersitsinissamut inuussutissarsiutitigullu suliniutit nutaat aallartinnissaannut atugassarititaasut pitsaasuusariaqarnerarneqarlutik.

Taamaaliunngikkutta atugarissaarnissamut qitiusumik sullissivinni, tassalu peqqinnissaqarfimmi, ilinniartitaanermi isumaginninnikullu isumannaallisaarnermi, ukiualiunnguit qaangiuppata sipaaruteqarujussuartariaqaliassaagut, allassimavoq.

- Tamannalu arlaannattaluunniit kissaatiginngilaa, Maliina Abelsen oqarpoq. Taassuma aamma erseqqissaatigaa, uninngaannarsinnaanngitsugut, neriulluta aatsitassanik tunisassiarineqarsinnaasunut nassaartoqassasoq.

Innuttaasut tunniussaqarnissamut pisussaaffeqarnerannik pissarsisinnaanermullu pisinmnatitaffeqarnerannik qulakkeerinnittumik oqimaaqatigiissaarisumik naalakkersuinikkut aalajangiisoqartariaqarpoq.

Taava politikerit qimulernissaannut ittoqutaasullu siunnerfimmut aallarnissaata utaqqinissaa tullinnguutissaaq. Aammali ittoqutit sukalisaarniarpallaarpata, miaggoorluta unikaallatsitsiniarsinnaavugut.

Naalakkersuisut Aningaasaqarnikkut ingerlatsineq pillugu nalunaarusiaat

pinngitsoorani sammisassaavoq. Missingersuusiortarneq pillugu inatsit napertorlugu ukiut tamaasa upernaakkut ataatsimiinnermi saqqummiunneqartartussaavoq.