Kalaallit Nunaat ajornartorsiortunut akisussaaqataavoq
Kalaallinut Danmarkimut nunasisunut inuuniarnikkullu ajornartorsiuteqartunut suliniutissanut 20 million koruunit missaanni naalagaaffik aningaasaliissuteqarpoq. Ajornartorsiulli nunatsinni pilersoq nunatsinni suliarineqaruni pitsaanerunnginnersoq Danmarkimi ilisimasanik ingerlatitseqqiinermut qitiusumik suliffeqarfiup pisortaa Anne Worning uparuaavoq.
Aningaasaliissutaasut kalaallinut Danmarkimut nunasisunut inuuniarnikkullu annertuumik ajornartorsiortunut ikiuiniarnermut atorneqarnissaat siunertaavoq. Kalaallit pineqartut imigassamik aanngajaarniutinilluuniit annertuumik atornerluisuupput amerlanerpaallu angerlasimaffeqanngitsuullutik.
-Taakkununnga ikiuniarluni aningaasaliissutissat inissinniarneqarput, taamaattorli pinaveersaartitsineq matumani aamma sammineqartariaqarpoq, Kalaallit Nunaat Danmarkilu akisussaaqatigiimmata. Isumaqarpunga pinaveersaartitsinermik suliaqarneq Kalaallit Nunaanni Danmarkimilu avillugu ingerlanneqartariaqartoq, Anne Worning oqarpoq.
Anne Worning isumaqarpoq nunatsinni pinaveersaartitsineq annersaasarnermut kinguaassiuutitigullu atornerluisarnermut tunngagaluartoq ajornartorsiutit tassanga pilersut Danmarkimut nuunnermi nassarneqartartut.
Tamanna pillugu Anne Worning isumaqarpoq kalaallit Danmarkimut nuuttut nunanit allanit nuuttutulli ikiorserneqarnissamut atatillugu periarfissaqartinneqartariaqartut.
Kalaaleqatitsinnut Danmarkimut nuussimasunut ajornartorsiuteqartunullu aningaasaliissutit utoqqaliniarsialinnut suliffissaqanngitsunut pisortallu ikiorsiissutaannik pisartagaqartunut atugassiaapput.
