Kalaallit Nunaat aamma eqqorneqartussaavoq
Ikummatissat ippassaq – juunip 30-anni – liiterimut 50 øremik akitsornerat aallaavigalugu, Nunatsinni aningaasarsiorneq pillugu ministeriunermut siunnersuisartut, siulittaasuat ilisimatooq Chresten Sørensen Radioaviisimut oqarpoq, ‘nunarsuatsinni uuliap akitsoraluttuinnarnerata Kalaallit Nunaannut aamma eqquisussaanera, naalakkersuisut isiginiartariaqaraat’.
- Tamatuma kinguneranik piffissami qaninnermi naatsorsuutigisinnaassavarput, nukissiuuteqarnikkut taamalu inuussutissarsiornikkut aamma atuisunut akit qaffariartussaassammata, Chresten Sørensen oqarpoq.
- Taamatut akit qaffannerat kalaallit inuussutissarsiornerata naleqqussarsinnaassusianut unammillernartussaavoq. Tassami ilaqutariit aningaasanik atuisinnaassusiat killilerneqassaaq aamma aningaasanik atuineq tamarmi milleriassaaq – taamalu pisortani akileraarutitigut isertitat ikileriarnerannik kinguneqassalluni, Chresten Sørensen oqarpoq.
Aningaasanut tunngasut unnugu Radioaviisimi annerusumik sammissavavut.
