Kalaallit Nunaat 161 millioni koruuninik amigartoorpoq

Kalaallit Nunaata avammut niuernikkut inissisimanerani 2007-imi qaammatit siulliit pingasut 161 millioni koruuninik amigartooruteqarfiuvoq. Piffissami tassani siornamut naleqqiullugu ajorseriarneruvoq.

Kisitsisit Kalaallit Nunaanni naatsorsueqqissaartarfimmeersut tamanna takutippaat – kisitsisilli tamakkiisumik qulakkeerinninngillat. Ineriartornermi nioqqutissanik eqqussuinermi aningaasartuuteqartoqarnerusimavoq avammullu tunisinermi nunarput isertitaqannginerusimalluni.

Ukiup qaammataani siullerni pingasuni nioqqutissanik 586 millioni koruunit nalinginik eqqussuisimavugut, siornamut naleqqiullugu 100 millioni koruuninik qaffariaateqarluni. Nioqqutissat amerlasuut qaffariaateqarfiusimapput.

Kalaallit Nunaat 2007-mi qaammatini siullerni pingasuni avammut tunisaqarsimavoq nioqqutissanik 425 millioni koruuninik nalilinnik, piffissami tassani siornamut naleqqiullugit 50 mio. koruuninik appariaateqarlutik. Tassani appariaatinut raajanik tunisinermit isertitat apparsaataanerpaapput.

Taamaattorli Kalaallit Nunaanni naatsorsueqqissaartarfiup ilisimatitsissutigaa avammut niuernermi kisitsisit mianersortumik nassuiaaserneqartariaqartut piffissamut sivisunerumut kisitsisit pineqarnissaannut.

Aamma ullumikkut nalorninassutsit annertunerummata, tassa Danmarkimi naatsorsueqqissaartarfiup Kalaallit Nunaata avammut niuerneranit kisitsisit allanngorlugit suliarimmatigit.