Kalaallit Nunaannut tunngasut Folketingimi oqallisigaat
Danmarkip ministeriunera Anders Fogh Rasmussen folketingimit pisinnaatinneqaqqammerpoq Kalaallit Nunaata Namminersulernissaanut pillugu isumaqatigiinniuteqaqqinnissaminut. Tamanna Folketingimi partiit akuerisssutigeqqammerpaat.
Folketingimi apeqquteqaat – tassalu Ministeriunerup Kalaallit Nunaata namminersulernissaanut isumalioqatigiisitat innersuussutaat pillugit qanoq paasissutissiisinnaanersoq – oqallisigineqarpoq.
- Folketingip akuersissuteqarnera tunngavigalugu Naalakkersuisut siulittaasuat Hans Enoksen maannakkut oqaloqatigissavara. Oqaloqatiginerani ersarissisassavarput suliniutit qanoq ingerlaqqissanersut, Ministeriuneq Anders Fogh Rasmussen oqallisereernerup kingorna Radioaviisimut taama ilisimatitsissuteqarpoq.
Folketingimi ullumi oqaluuserineqartut ilagaattaaq Kalaallit Nunaanni angallannermut inatsisip pingajussaaneerlugu naggataarnera. Angallannermut inatsit atuutilerpat, assersuutigalugu biilinik aquttoq ilaasullu tamarmik qitequsertalissapput. Ingerlaartillutik mobilikkut oqaluusseqqusaassanngillat snescooterinillu ingerlatsisuuniaraanni 18-inik ukioqalereersimanissaq piumasaqaataalissaaq.
