Kalaallit Nunaannut takornariartartut suli amerliartorput
Nunani avannarlerni tamani akunnittarfinni unnuisartut 2006-mi amerliarput Kalaallit Nunaannili malunnarnerpaamik.
Piffissarli ineriartorfiusoq sivisunerusoq eqqarsaatigalugu akunnittarfinni unnuisartut malunnarnerusumik Savalimmiuni Islandimilu amerleriarsimanerarneqarput. Takornariartitsisarnerli ataatsimut qissimikkaanni nunat avannarliit taakkuupput allanut naleqqiullutik siuariarfiunerpaasut.
Naatsorsueqqissaartarfiup ukiumoortumik saqqummersittagaa, Nordisk Statistik Årbog, Nordisk Ministerrådimit aningaasalerneqartartoq, nunani avannarlerni, tassa Danmarkimi, Finlandimi, Islandimi, Norgemi Sverigemi nunanilu namminersornerulerfiusimasuni, Savalimmiuni, Kalaallit Nunaanni Ålandimilu assigiinngitsutigut ineriartornikkut paasissutissanik assigiinngitsorpassuarnik imaqarpoq.
Naatsorsueqqissaartarfiup ukiumoortumik saqqummersitaani kingullermi aamma atuarneqarsinnaavoq Kalaallit Nunaat suli imigassartorfiunerpaasoq, inuup ataatsip ukiumut imertarmagu imigassaq kimittooq 12,1 literi. Danmark tulliuvoq, tappavani agguaqatigiisillugu ukiumut imerneqartarmat imigassaq kimittooq 11,0 literi.
