Kalaallit Nunaannut ataatsimiititaliaq misissuinissamut tuavisaarilerpoq
Amerikamiut timmisartorsuat B-52 Pituffiup eqqaani 1968-imi nakkarmat innuttaasut qinngornernik navianartumik eqqorneqarsimanersut misissuinissap takutittussaassavaa.
Timmisartorsuaq B-52 qaartartortunik sisamanik useqarluni nakkarpoq, maannalu ukiut 40-t qaangiutereeraluartut qaartartorsuit tamarmik, imaluunniit pingasuinnaat nassaarineqarsimanersut USA-mullu nassiunneqarsimanersut suli iluamik qulakkeerneqanngilaq.
Qaartartorsuit sisamaasut nakkarnerminni aserorsimagaluarlutik tamarmik qaqinneqarsimasut, containerinullu isumannaallisakkanut inisseriarlugit nassiussuunneqareersimasut, Dansk Institut for Internationale Studier - tassa danskit nunat tamalaani misissuisoqarfianeersut aasaq manna misissuereernermi kingorna taamatut nalunaarusiorput.
Nalunaarusiaq Folketingimi ilaasortaatitanit, Juliane Henningsenimit Lars-Emil Johansenimillu naammaginartinneqanngilaq, taamaatumillu Naalakkersuisut Siulittaasuat, Kuupik Kleist, Per Stig Møllerilu piumaffigineqarput USA-p præsidentianik Barack Obamamik toqqaannartumik attaveqaqqullugit, qaartartorsuillu sisamaat qanorpiaq pineqarsimanersoq paasiniaqqullugu.
