"Kalaallit Nunaannit qimarranneq" qisuariarfigineqaqaaq

”Namminersornerullutik Oqartussat nakkutigineqalertariaqarput” – aallakaatitassiaq naaginnartoq Søren Espersen Dansk Folkepartiimeersoq taama nalunaarpoq.

- Kalaallit Nunaanni nunaqartut tamarmik danskit naalagaaffiannut innuttaassuseqarput. Aamma akuersaarsinnaanngilarput meeraqarmat pisariaqartitaminnik pissarsineq ajortunik, majuartarfinni sinittartunik kiisalu taamannaannaq qanigisaminnit arneriffigineqartartunik, Søren Espersen ippassaq unnukkut TV-Aviisimut oqarpoq.

Taamatut isummersornera danskit Folketingianni illuatungerisaanit isumaqatigineqanngilaq.

Line Barfodip Enhedslistemeersup, Namminersorneq Pillugu Isumalioqatigiinni ilaasortaasup, akisussaaffiit amerlanerusut Nunatsinnut nuunniarpai.

- Kalaallit Nunaanni ajornartorsiutit angeqaat. Nunasiaanermiit nunatut moderniusutut ingerlalerniarneq aamma imaannaanngilaq, aamma isumaqarpunga Søren Espersenip Københavnimiit angussuaasaarnera iluaqutaanavianngilaq. Ajornartorsiutit qanoq qaangerneqarnissaat aamma meeqqat qanoq ikiorsersinnaanerivut Søren Espersenip siunnersuutissaqarfiginngilaa, Line Barfod oqarpoq.

Kalaallit Nunaanni ajornartorsiutit imaannanngitsut qaangerniarnerini kalaallit peqatigeqqissaartariaqarpavut, Line Barfod nangilluni oqarpoq.

- Kalaallit naligisatsitut oqaloqatigisariaqarpavut, nunasiaatilittut pissusilersornata, Line Barfod nutaarsiassaqartitsivimmut Ritzauimut oqarpoq.

TV-kkut aallakaatitassiaq piviusulersaarut ”Kalaallit Nunaannit qimarranneq” kalaallisut oqaasertalersorlugu KNR-TV-kkut unnugu aallakaatinneqassaaq.