Kalaallit Nunaannit inuulluaqqusisoqassaaq
Kunngissap Frederiup nuliatalu Maryp marluliaataat Københavnimi oqaluffissuarmi, Holmens Kirkemi, sisamanngorpat kuisissapput. KNR-TV-lu ullaarnganiit aallakaatitsissaaq, kuisitsinissaq sioqqutitsiarlugu pisunik takutitsissaaq.
Kalaallit Nunaanniit piffissami tassani soorunami aamma inuulluaqqusisoqassaaq, marlulissammi angutaat, Kunngissaq Frederik, kalaallinut immikkut ittumik attaveqarluartuummat.
Danmarkip Radioata tv-kkut toqqaannartumik aallakaatitsinissaanut atugassanik inuulluaqqussutinik katersilluni KNR-TV ulluni makkunani ulapaarpoq, kalaallillu marlulissat tallimat inuulluaqqussutinik nassitsinissaminnut Nuutoqqami sissiukkami ippassaq assilineqarput, Kunngissakkut marluliaataannut aamma pilluaqqusillutik.
Kalaallit ilinniarnertuunngorniat, ilinniagaqartut soraarnerillu kunngikkormiuaqqanut marlulissanut aamma inuulluaqqusitinneqassapput.
Marlulissat qanoq ateqassanersut sisamanngorpat paasinarsissaaq, kunngikkormiullu aterpassuaqartarmata marlulissat kalaalerpaluttumik ilaatigut atserneqarnissaat Kalaallit Nunaannit neriuutigineqaraluarpoq.
