Kalaallit Nunaannik ilisimasalik nunanik avannarlernik suleqateqarnermut Danmarkimi ministerinngortoq

Flemming Møller Mortensen (S) peqqissaasutut Kalaallit Nunaanni sulisimavoq, Kalaallit Nunaannullu tunngasunut socialdemokratit sinnerlugit oqaaseqartartuusimalluni.
Flemming Møller Mortensen ataqqinartorsuaq dronning Margrethe kungissarlu Frederik Amalienborgimi sisamanngornermi naapippai, naligiissitaanermut nunanillu avannarlernik suleqateqarnermut ministerinngornermi tassani ilisaritinneqarluni. Assi © : RitzauScanpix
novembarip 20-at 2020 08:14
Nutserisoq Mads Lynge

Flemming Møller Mortensen, Danmarkimi socialdemokratit sinnerlugit sisamanngornermi ministerinngorpoq, naligiissitaanermut nunanillu avannarlernik suleqateqarnermut ministerinngorluni.

Politikerimillu Naalagaaffeqatigiinnermut tunngasunik ilisimasalimmik ministerinngortoqarpoq.

57-inik ukiulik Jyllandip avannaaneersoq peqqissaasutut ilinniarsimavoq, Ilulissanilu napparsimmavimmi peqqissaasutut 1994-imi sulisimalluni. Peqqissaasutut naammasseqqammiinnarluni Indiami pupinnermik nappaatilinnik sullissereersorlu Ilulissani sulilerpoq.

Folketingimut 2007-imi qinigaavoq, Socialdemokratillu sinnerlugit Kalaallit Nunaannut Savalimmiunullu tunngasunut ukiorpaalunni oqaaseqartartuusimalluni.

Flemming Møller Mortensenip ministerinngornermigut pingaarnertut sammisassai tassaapput naligiissitaaneq nunanillu avannnarlernik suleqateqarneq, nunanullu allanut tunngasunut ministeri Jeppe Kofod suleqatigilluassallugu.

Ministeriuneq Mette Frederiksen ministerimik nutaamik allamik aamma toqqaavoq, Rasmus Prehn, socialdemokratineersoq, inuussutissanut, nunalerinermut aalisarnermullu ministerinngormat.

Flemming Møller Mortensen, inuussutissanut, aalisarnermut nunanillu avannarlernik suleqateqarnermut ministeriusimasup Mogens Jensenip ministereqarfianut inissippoq.
Mogens Jensen minkit toqorarneqarnissaannut suliamut atatillugu ministeritut sapaatip-akunnerata massuma ingerlanerani tunuarpoq.