Kalaallit Nunaanniit kikkut Folketingimut ilaasortanngussanersut unnugu nalunarunnaassaaq

Folketingimut qinersineq unnugu naammassippat qinersisullu kisinneqareerpata, Kalaalit Nunaanniit kikkut ilaasortanngornersut nalunarunnaassaaq. Kalaallit Nunaanni qinersiviit ullaap tungaa qulingiluanut ammarneqassapput. Folketingimut qinersineq pissutigalugu Inatsisartut ulloq ataaseq sulinngiffeqarniarlutik aalajangerpaat, kisianni taama pisoqannginnerani ippassaq taasisitsisoqaqqaarpoq.
novembarip 13-at 2007 05:19

Partiit tamangajammik – Kattusseqatigiit Partiiat kisimi pinnani – taasinermikkut aalajangerpaat, novembarip ulluisa 13-iat Inatsisartunut ilaasortanut sulinngiffiussasoq. Tassa 22-t tamatumunnga akuersillutik, ataaserlu akerliulluni.

- Demokraatini kinguartitsinernik ornigisaqarpallaanngikkaluarluta aqagu ulloq demokratiimut pingaaruteqaqimmat isumaqatigaarput Inatsisartut ataatsimiinnerat uninngatinneqarallassammat, partip siulittaasua Per Berthelsen Sermitsiamut oqarpoq.

Kattusseqatigiit Partiiata ilaasortaatitaata Anthon Frederiksenip isummani aalajangiusimavaa – aamma taasisoqarnerata kingorna – tassa qinersisoqaraluarpalluunniit Inatsisartut sulissasut.

- Taama ulapitsigaluta sulinngiffeqartariaqanngikkaluarpugut. Ulloq ataatsimiiffissarput kingulleq – pingasunngorneq novembarip ulluisa 14-iat – ulapiffiussaqaaq – suliavullu tuaviuunneqapiluttussaassapput, Anthon Frederiksen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq