Kalaallit Nunaanni pisuut piitsullu assigiinnginnerat ersarinnerulissaaq

Nunaqarfinni pissakilliortut meerai eqqungaanerusarput.

Tamanna MIPI-p Kalaallit Nunaanni pissakilliortut meerai pillugit nalunaarusiaani atuarneqarsinnaavoq.

Inooqatigiit pissusaat pillugit ilisimatooq Maliina Abelsen-ip nalunaarusiami oqariartuutigineqartut tupaallaatiginngilai, Nunatsinnilu inuit piitsut pisuullu imminnut ungasilliartuinnarsinnaanerat siooranartutut isigalugu, illoqarfinnilu atugassarititat nunaqarfinni atugassarititanut naleqqiullugit ajornerujartuinnarsinnaanerat aamma siooranartutut isigalugu.

- Kalaallit Nunaanni aningaasarsiorneq qiviassagutsigu

kommunet ataasiakkaat anginerusut aningaasarsiorluarfiunerusutut inissisimapput. Illoqarfiit isertitarissaanerusut tassaaput Nuuk Sisimiut Qaqortoq Ilulissallu.

Kommunillu mikinerusut annikinnerusumik aningaasarsiorfigineqarput, Maliina Abelsen oqarpoq.

Nangillunilu.

Misissuilluaraanni takuneqarsinnaavoq illoqarfinni inuit isertitaat kiisalu nunaqarfinni inuit aningaasatigut isertitaat annertuummik nikingassuteqartut.

Tassa massakkut nikingassut alliortorpoq nunaqarfinni imaluuniit illoqarfimmi najugaqarneq pissutigalugu annertuumik aningaasatigut isertitaqarnikkut nikingassuteqaleriartortoqarmat, Maliina Abelsen oqarpoq.

Tamanna inuiaqatigiinut qanoq kinguneqarsinnaava?

Tamatuma kingunerisinnaavaa inuit nunaqarfinni najugallit nunaqarfimminniituassagunik inuttut ineriartorsinnaanerat killilerneqassasoq .

Tamanna politikkikkut eqqartorneqartariaqarpoq ilumut nunaqarfinni illoqarfinniluuniit najugaqaraanni inooriaaseq assigiittoq atorneqarsinnaanersoq.

Ullumikkummi Kalaallit Nunaanni atugartuussutsikkut inuiaqatigiit atugarissaarlutik inuuniartussaapput. Taammaattumik apeqqutigineqarsinnaavoq ilumut nunaqarfinni atugassarititaasut naammattumik atortinneqarnersut, tamakkulu nunaqarfinni najugaqartunut naammattumik politikerinit tunniuunneqarsinnaanersut, Maliina Abelsen oqarpoq.

Maliina Abelsen ima naggasiivoq.

Tamaammallu apeqqutit taamaatut ajoraluartumik politikkerinit oqallisiginissai mianerineqartarput, kisiannili nunaqarfinni atugassarititaasut politikkerinit oqallisigineqarnissai pisariaqaraluarput. Oqaluuserineqanngikkunimi nunaqarfinni nujagaqartunut kingunerluuteqarsinnaammata.