Kalaallit Nunaanni marraq atorlugu illuliortoqarsinnaalerunarpoq
Sisimiuni ujakkaartartut illuat Center for Arktisk Teknologimit misiliutitut sananeqarsimasoq maanna ukiut pingasut napareerpoq.
Professor Arne Willumsen, Center for Arktisk Teknologimi pisortaq Kangerlussuarmi mittarfiup eqqaani puussiaq marrarmik immeriarlugu Danmarkimi qarmasissialiorfimmi misiliigami atorsinnaarpasimmat isumassarsiani ingerlateqqippaa. Marrarmik 80 tonsimik aalleriarlutik Danmarkimi qarmasissiorput, taakkualu Sisimiunukaateriarlugit ujakkaartartut illuaraliuullugit. Tassalu illuaraq maanna ukiuni pingasuni napareerpoq.
- Misiliinitsinni paaserusupparput Kalaallit Nunaanni illuliuutigissallugu ajunnginnersoq. Paasisagullu naapertorlugit tamanna akornutissanngilaq. Qarmasissiat kusanaannaratik aamma allanngoratik ukiorpassuit napasinnaassapput, Professor Arne Willumsen oqarpoq. Maannakkut Kalaallit Nunaanni suliffeqarfiit soqutiginittut peqatigalugit qarmasissiorfiliorsinnaavugut, Danmarkiliaateqqaartarnissaammi pisariaqanngilaq, suliassaq pisariitsumik Kalaallit Nunaanni naammassineqarsinnaammat. Aallaqqaammut qarmasissianik, ukiumut 40-nik 50-inilluunnit illuliuutigineqarsinnaasunik pisariunngitsumik qarmasissiorfiliortoqarsinaavoq, professor Arne Willumsen oqarpoq.
Kangerlussuarmi marraqarfik, Danmarkimi qarmasissiorfiit tamarmik ukiuni 16-ini atortagaattut annertutigaaq, Kalaallit Nunaatalu kangerluini taama annertutigisukkaartunik aamma marraqartoq, Arne Willumsen oqarpoq.
