Kalaallit Nunaanni inuueqatissarsiorput
TV-kkut aallakaatitassiat inuueqatigiit nunanit assigiinngitsuneersut malittareqattaarpaat. Aallakaatitassiani anguniarneqarpoq inuit nunarsuup illuatungaani inuusimagaluarunik qanoq inuuneqarsinnaasimagaluarneri misissussallugit. Belgiamiut angutit 16-it arnallu arfineq marluk aallaavigineqarput, taakkualu kikkuuneri isertuuteqqissaarneqarlutik aallakaatitassiarlu aallakaatinneqalerpat aatsaat kikkuuneri qulaarneqartussaallutik. Manna tikillugu inuueqatigiit 25-t nunanit assigiinngitsuneersut, soorlu Kinameersut, Cameroonimeersut Kroatiameersullu aallakaatitassiami ilaatitassatut toqqarneqarsimapput.
Aallakatitassiami piviusulersaarummi belgiamiut 23-t inuueqatiminik pingasunik nunanit assigiinngitsuneersunik naapeqateqartinneqassapput. Aallakaatitassiortut inuueqatigiit naapinnerat piffissamilu siullermi katerisimaarnerat aallakaatitassiarissamaarpaat.
-Piviusulersaarutitsinni isiginnaartut qanoq ilissi nunassinni ulluinnarni inuunermik paasisaqarfiginninnerunissaannik periarfissiissaagut. Inuit peqataatinneqartut ataqqillugit nuannaajallannartunik piviusulersaarutinik aallakaatitassiorusuppugut, aallakaatitassianut akisussaasoq, Annelor De Donder oqarpoq. Aallakaatitassiat taaguuteqassapput ”Twins”.
Taamaammat 1933-mi apriilip ulluisa 29-anni imaluunniit 1968-imi oktobarip ulluisa tallimaanni 1982-imiluunniit juulip ulluisa 24-anni inunngorsimaguit taava belgiamiut tusarfigerusuttorujussuuvaatsit, uungalu e-mailerfigisinnaavatit twins@docfish.be. KNR-ip nittartagaani knr-gl-imi inuit 23-it tamarmik ullut inuuii nutaarsiassaq ataaniittoq toorlugu takusinnaavatit.
