Kalaallit Nunaanni eqqartuussiveqarneq oqallisigilerpaat

Saqqummiisuussapput folketingimi ilaasortaq Per Ørum Jørgensen Kristendemokraterneersoq, eqqartuussissuserisoq Thorkild Høyer, kalaallit Herstedvesterimi parnaarussat arlaqartut sinnerlugit peqataasoq, Ole Møller, Herstedvesterimi parnaarussaaqqanikoq aamma Leif Senholt, Kalaallit Nunaanni Eqqartuussiveqarnermik ilisimatooq.

Leif Senholtip eqqartuussiveqarnerup aaqqissuussaanerata nutartarnera nuannaartorinartikkaluaqalugu, atuutilersinneqarnera uparuagassartaqartippaa.

- Kalaallit Nunaat aaqqissuusseqqinnermigut inuttut pisinnaatitaaffiit maleruarnissaannut aamma inuinnaat naalakkersueqataanerannut atatillugu malinnaalluarput, kisianni inatsisip qanoq atuutsinnera naammaginngilara, oqarpoq.

Assersuutigaa Pinerluttulerinermi inatsisip aamma Eqqartuussiveqarnermut inatsisip siorna ukiortaami atuutilersinneqarnerisa kingorna inuiaqatigiinni sulisitaanermik ataasiaannavilluni pineqaatissiisoqarsimanera. Inuiaqatigiinni sulisitaaneq tassaagaluarpoq pineqaatissiineq Pineqaatissinneqarsimasunut Inissiisarfinniittussat utaqqisorpassuit ikilisarnissaanut atorluagassaagaluaq.

Leif Senholt oqarpoq, inuiaqatigiinni sulisitaanermik pineqaatissiisoqarnerulerpat, Pineqaatissinneqarsimasunut inissiisarfinniittussat inuunerminni ingerlaqqipallassagaluartut ukiorpassuarnilu utaqqisariaarutissagaluarlutik.

Kalaallit Illuutaanni unnugu oqallinnissami aamma Herstedvesterimi parnaarussatut atukkat, Kalaallit Nunaannilu matoqqasumik 2015-imi naammassisussamik parnaarussiveqalernissaq aamma tikinneqassapput. Ilaatigut Naalakkersuisut decembarimi saqqummiussaat, tassa parnaarussiviliornissamut aningaasaliissutissat pillugit pilersaarutit unitsikkallartariaqarnerat, ernumanartoqartinneqarpoq, parnaarussiveqalernissamut kinguarsaataaginnassammat.