Kalaallit Nunaanni allanngornerujussuit
Kalaallit Nunaanni allanngornerujussuit ukiuni 20-ni tulliuttuni pisussaassapput, taakkulu pilersaarusioqqissaarnissaat pisariaqarpoq.
Ilaatigut pineqarput silap pissusaata allanngoriartornera, aluminiumik aatsitsiviliorniarneq, aatsitassarsiorfinnik nutaanik ammaanerit kiisalu imartatsinni uuliamik qalluiviliorsinnaaneq.
januaarip 23-at 2008 06:19
Ilisimatusartut 80-it, politikerit atorfilittallu aqagu pingasunngornermi sisamanngorpallu Kalaallit Nunaanni pilersaarusiornissaq pillugu Nuummi isumasioqatigiissapput. Isumasioqatigiinneq aluminiumik aatsitsivissap sumiinnissaanik aalajangiisoqartinnagu pilersaarusiornermut ilaavoq.
-Isumasioqatigiinnermi siunertarineqartut ilagaat qanoq ililluta Kalaallit Nunaanni ineriartortitsinermi kommunit kattussuunnerannut atatillugu aamma suliffissuarnik pilersaarusiornermut atatillugu qanoq isumassarsiorsinnaanersugut, aaqqissueqataasoq Klaus Georg Hansen Avatangiisinut Pinngortitamullu pisortaqarfimmi nuna tamakkerlugu pilersaarusiornermut immikkoortortami allaffimmi pisortaasoq oqarpoq.
