Kalaallit nipilersugaat nuannarisaapput
Ilisimaneqarluartut Rasmus Lyberth, Nivi Nielsen aamma Simon Lynge kalaallit nipilersugaannik nunanut allanut nittarsaassinermi sallersaasarput. Taakku maanna nipilersoqatigiinnit inuusuttunit pingasunit ilaqalerput.
Nipilersukkat nuannarineqarnerat allassimaffiat Chartbase imminut nittarsaattarpoq Danmarkimi nipilersukkat nuannarineqarnerillu pillugit nittartakkat arlaannaannulluunniit attuumassuteqanngitsut anginersaattut. Tassani rock-imik nuannarineqarnerni Sanne Salomonsen siuartuuvoq, tassanili allassimaffimmi kalaallit nipilersoqatigiit pingasut peqataapput.
Taakku tassaapput Nanook erinarsuut "Ai Ai" atorlugu CB Rockchart-imik taaneqartartumi normu 5-tut inissisimasut. Tassa Qaammataasat normu 8-aapput erinarsuut "Kisivit" atorlugu. Ammullu ingerlaqqilaaraanni siumugassaapput nipilersoqatigiit Thornstone normu 18.-usut erinarsuut "Sussa Igloo" atorlugu.
Ulluinnarsiutaanngilaq kalaallit nipilersoqatigiit pingasut ataatsikkut Danmarkimi nipilersukkat nuannarineqarnerit allassimaffianniittarnerat asulu marluk tassani nuannarineqarnerat qulit akornanniillutik.
- Ullutsinni nipilersortartut atugaat allaanerupput Zikaza-kkut, Inneruulat, Inuit Sume-kkullu nunatsinni sallersaanerannut sanilliullugit, eqqumiitsuliortut kattuffissuanni Eqqumiitsuliornikkut Pinngorartitsisut Ingerlatsisullu-mi siulittaasoq Leif Immanuelsen KNR-imut taama oqarpoq.
Taanna nammineq ukiut qulikkaat arlallit nipilersortartuusimavoq IPIS-imilu siulittaasuuvoq nipilersortartut kattuffiat tunulequtaralugu.
- Inuusuttut ullutsinni piffissaqarnerupput takoqqusaarnissamut aammalu periarfissanik atorluaallutik nipilersukkaminnik nittarsaassillaqqinnerulersimallutik, Leif Immanuelsen oqarpoq.
