Kalaallit nipilersortartut Roskilde Festivalimi qaqutigoortuupput

Nipilersortartut nunanit arlalippassuarneersut soorlu, Malimiit, Hondorasimiit, Japanimiit, Serbiamiit, Beninimiit aamma Chilemiit. Tassa tamakkuupput Roskilde Festivali sisamanngorpat aallartippat tusarnaarneqarsinnaasut.

Ukioq manna aammaarluni Kalaallit Nunaanniit nipilersortartunik tusarnaartitsisoqassanngilaq. Tamannali takornartaanngilaq, tassami Roskilde Festivalimik aaqqissuisut kalaallinik nipilersortartunik qaaqqusineq ajormata.

Immiussisarfiup Atlantic Records-ip aallartitsisuata, Ejvind Elsnerip kalaallinik nipilersortartunik peqataatitaqartannginneq tupigaa, taassuma arlaleriarluni tamaviaarutigisaraluarpaa nipilersortartunik nunatsinneersunit peqataatitaqartoqarnissaa.

- Qinnuteqartut amerlavallaartarneri pissutigalugit toqqarneqanngitsoortartugut oqaatigineqartarpoq. Naak akeqanngitsumik nipilersornissatsinnik neqeroortaraluarluta akuerineqarneq ajorpugut. Maani Kalaallit Nunaanni nipilersortartorpassuarnik peqarpugut ajukkunnanngivissunik, Ejvind Elsner oqarpoq.

Nunani allani tusarnaartitsinissat Danmarkimut naleqqiullugit ajornannginneralaakasiusut Ejvind Elsnerip paasisimavaa.

- Assersuutigalugu Norgemi Riddu Riddu Festival ukiut tamaasa kalaallinik nipilersortartunik marlussunnik qaaqqusisarpoq, Elsner oqarpoq nangillunilu:

- Danmarkimi nipilersornissat ajornarpallaaqimmata nunap taassuma sussakkiiginnarnissaa eqqarsaatigisaraluarparput, ilimanarmat Norgemi ilisimaneqalernissaq ajornannginnerusoq.

Holger Kleist Roskilde Festivalimut ukiut 13-it kingulliit tusarnaariartarpoq, taassuma kalaallit nipilersortartut amigaatigisutut oqaatigisinnaavai.

- Kalaallit nipilersortartut takorusuttaraluarpakka. Pitsassuarnik nipilersortartoqarpugut Roskilde Festivalimut ajukkunnanngitsunik, Holger Kleist oqarpoq.

Holger Kleistip aamma oqaatigaa, ukiuni 13-ini Roskilde Festivalertoqarnerani peqataasarnermini kalaaleq nipilersortartoq ataasiinnaq tusarnaarsimallugu, tassalu Angu:

- Taamaakkaluartoq Roskilde Festival nuannertaqaaq, aamma ukioq manna taamaassaaq, Holger Kleist oqarpoq.

Kalaallinik nipilersortartunik Roskilde Festivalimukartitsinissaq Atlantic Music-imiit sulissutigiuarneqassasoq oqaatigineqarpoq:

- Tunniutiinnarnianngilagut. Sulissutigiuassavarput, Ejvind Elsner oqarpoq.