Kalaallit mutinik atisaliortartut Seattlemi takutitsisut

Najannguaq Davidsen Lennert, Bibi Chemnitz, Louise Lynge Hansen aamma Julie Edel Hardenberg nunatsinnit amerikamiunut nunanilu Avannarlermiunut soqutiginnittunut takutitsisuupput.
Julie Edel Hardenbergip, atisanik ilusilersuisartuunngikkaluarluni peqataasup, saqqummersitsinermi peqataaneq pissarsinarnerarpaa.  

- Atisanik saqqummersitseqataaffiga ima qulequtalik "Looking back to our future", Nordic Heritage Museumimi takutinneqarnera tulluartippara. Saqqummersitsineq, oqalugiartarnerit, tusarnaariallu apeqqusiisarneri assut soqutiginarsimapput malinnaaffigalugit, Julie Edel Hardenberg oqarpoq.

Pingaartumik islandimiut nammineq avatangiisiminnik torrallaallutik atuilluartarnerat takullugit tusarlugillu isumassarsiffigisimaqai iliuuseqarusuummissutigisimallugillu.

- Eqqarsarpunga nunatsinni inuit assassullaqqissut, suliaat atortuilu alutornartunik oqaluttuassartallit, nittarsaakkusuummerlugit, oqarpoq.

Kalaallit atisanik mutiliaasa assingi nittartakkami napa.gl-imi takuneqarsinnaapput.