Kalaallit meerartaat sammisassaqartinneqarput

Maanna aasap nunaanut nuussaagut: Danmarkimi qeqertat ilaanni Langelandimi Kalaallit meerartaat 40 -t maanna aasarsiuleruttorput.

Aaqqissuisut Peqatigiiffik Kalaallit Meerartaat generalsekretæria Marianne Jensen -ip ima oqaatigaa.

- Danmarkimi inuiaqatigiiusunut akuliunniarnermut kalaallit ajornartorsiuteqartut, ikiorserniarlugit Danmarkimi suliniut nutaaq maannakkut ingerlapparput. Tassa kiserliortut aammalu meeqqanut periarfissanut akuuallaanngitsunut ikiorsiiniarluta, una suliniut aallartinnikuuarput, Marianne Jensen oqarpoq nangillunilu: - Meeqqaat kalaallit Danmarkimi akuliunniarnerminni ajornartorsiuteqartut, taakkua tapersersorusullutigit, inuiaqatigiinnut nuannersumik akuulernerulernissaannut suliniuterput qanittunnguami aallartippoq, ukiunilu tulliuttuni pingasuni suliniut ingerlasussaalluni. Siullermik socialministeeriap SAS-puljemidlerinik tunniussinera atorlugu maannakkut aaqqissuussivugut. Ukiut pingasut qaangiuppata, neriuppunga Danmarkimi pisortat, tassalu kommunit namminneerlutik suliniuteqarnerulissasut. Aammalu Danmarkimi naalakkersuisut taamanikkussamut ajornartorsiummut tappinnerulersimassasut neriuppunga. Tamannalu aqqutigalugu kalaallit pisariaqartitsisut Danmarikimi sullinneqarneris pitsannguallanneranik kinguneqarnissaa neriuutigaara. Marianne Jensen taama oqarpoq. Aasarsiornerup siulliup kingorna aggustimiit aallartittumik ilaqutariit inuiaqatigiinnut akuliunnissaminnik ajornartorsiutillit qaammammut katersuutittarnissaat pilersaarutigineqarpoq. Socialministereqarfiup Peqatigiiffik Kalaallit Meerartaat 20 millioni koruuninik tapiiffigeqqammerpaat meeqqat inuusuttullu ilaqutaallu inuiaqatigiinnut akuliunniarnissaannut atugasiissutigineqartut.