Kalaallit meerartaasa atuarneq nuannaraat

Nunani 41-ni meeqqat 402.000-it, taakkunannga kalaallit 2.500-t, atugaat aallaavigalugit inuusuttuaqqat peqqissusaat pillugu Naalagaaffiit Peqatigiit ataanni peqqinnissamut suleqatigiiffimmit, WHO-mit, nalunaarusiortoqarpoq. Kalaallit peqqissusaat qiimmaallannartortaqarlunilu ilaatigut nuannerpallaanngitsunik paasissutissartaqarpoq. Kalaallit Nunaanni pissutsinik misissuisimasoq, nakorsaq Birgit Niclasen suleqatitta Peter Damborgip aperaa maani pinaveersaartitsinermik suliallit suut eqqumaffigisariaqaraat.
juunip 17-at 2008 17:07

Nalunaarusiami atuarneqarsinnaasut nuannersut qiviarutsigit qiimmaallannarpoq atuarlugu kaallaallit meerartaasa atuarnertik allanut sanilliullutik nuannarinerugaat, atuartullu qanoq pissarissaartiginerat atuarnerminni pissarsiaannut sunniuteqanngitsoq paasineqarmat. Pissutsillu taamaannerisa atuartut ilinniaqqinnissamut periarfissaqarluartut, allanut sanilliullugit amerlanerusut atuarneqarsinnaavoq.

Kalaallit inuusuttuarartaasa allanut sanilliullutik pujortarnerunerat, imigassartortalijaartarnerunerat aanngajaarutinillu misiliijaartarnerat nalunaarusiami atuagassat nuanninngitsut ilagaat.

Uani nalunaarusiami nunani tamani pissutsit imminnut sanilliutsiterlugit ilanngunneqarsimapput. Taannalu issittumi peqqissuseq pillugu nalunaarusiamut siorna saqqummersumut uiggiutaasutut isigineqassaaq. Nalunaarusianilu taamattuni paasisat sumiiffinni pinaveersaartitsisut sakkugisinnaasussaavaat. Sukumiisumillu pissutsinik allanngortitsiniassagaanni meeqqat inuusuttullu qaqugukkut sunik sunnerneqarlutik qanoq inooriaaseqalertarnerannik paasisat aallaviusariaqarput, nakorsaq ilisimatusartoq, Birgit Niclasen oqarpoq.

Taassuma erseqqissarpaa Naalagaaffiit Peqatigiit nalunaarusiaat maanna saqqummersoq, Kalaallit Nunaanni peqqissuseq pillugu nalunaarusiamut siorna saqqummersumut ilapittuutissaqqissoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq