Kalaallit meerartaannik misileraanermut peqataasimanini Red Barnetip ajuusaarutigalugulu utoqqatsissutigaa

Kalaallit meeqqat 22-t ilaquttaminnit arsaagaallutik Danmarkimut 'perorsaqqitassanngorlugit' 1951-imi aallartitaanerat assortorneqarsinnaanngitsumik eqqunngitsuliorneruvoq.

Allattoq Helle Nørrelund Sørensen

oktobarip 20-at 2015 11:59

Nutserisoq Simon Uldum -

Red Barnetimit, taamani meeraallutik aallartitaasut kingullersaannut toqqaannartumik sisamanngorpat utoqqatserniartumit, taama oqaatigineqarpoq.

- Taamatut aaqqissuussisoqarsimanera kukkuneruvoq.

Suliniaqatigiiffimmi Red Barnetimi, 1951-imi pinngitsaaliinikkut qimagutititsinermut peqataasimasumi, generalsekretæriugallartoq Jonas Keiding Lindholm taama oqarpoq.

Taamaammat suliniaqatigiiffik taamani meeraasunut Red Barnetimik naapeqateqarnissamik kissaateqarsimasunut - maana - sisamanngorpallu utoqqatserusuppoq.

Aamma atuaruk Saammaateqatigiinnissamut isumalioqatigiissitaq misissuisoqarnissaanik ujartuisoq

- Kiserngoruttut sisamaasut ataatsimiinnissamut qaaqqusimasagut oqarfigerusuppakka aaqqissuussineq Red Barnetip taamani peqataaffigisimasaa - nalitsinni pissutsit tunngavigalugit - tulluartuunngitsutut taasariaqartoq. Peqataatinneqartunut innarliisimavoq meeqqallu tunngaviusumik pisinnaatitaaffiinik unioqqutitsinerulluni. Aaqqissuussinermut tassunga peqataasimanerput suliniaqatigiiffik sinnerlugu utoqqatsissutigaara, aammalu inuuneranni taama annertutigisumik ajoqusiisimanerput ajuusaarutigalugu.

Red Barnetip generalsekretærerisimasaa Mimi Jakobsen Danmarkimi radioaviisimi tamannarpiaq pillugu 2010-mi utoqqatserpoq.

Suliniaqatigiiffiulli nassuerutigaa utoqqatserneq taamani eqqugaasimasunut toqqaannartumik tunniunneqarsimanngimmat.

Taamaammat Helene Thiesen, meeqqat aallartitaasimasut 22-t ilaat, aasaq saaffiginnissuteqarmat Jonas Keiding Lindholmip suliaq qaqeqqippaa.

AAMMA ATUARUK Red Barnet Eksperimentimut peqataasimaneq utoqqatsissutigaat

- Suliaq misissorluareerlugu paasilerpara meeqqat pineqartut innarlersimallutigit, taamaattumillu utoqqatserfigineqarnissaat inissaminiippoq, tamannalu sisamanngorpat pissaaq.

Ataatsimeeqatigiinneq sisamanngorpat pisussaq matoqqasumik ingerlanneqassaaq. Taamani meeraallutik peqataatinneqarsimasut sisamaasut, generalsekretæriugallartoq Jonas Keiding Lindholm aamma Red Barnetip siulersuisuini siulittaasoq Lars Svenning Andersen peqataassapput.

Red Barnet ataatsimiinnerup kingorna nalunaarummik suliniaqatigiiffiup nittartagaanut ilisissasoq aamma ilisimatitsissutigineqarpoq.

"Utoqqatserfigineqarnissap utaqqinera" KNR-ikkut oktobarip 22-ani isiginnaarsinnaavat. Taanna meeqqat 1951-mi Danmarkimut aallartinneqarsimasut, Kristine Heinesen aamma Carla Lucia Knakkergaard, misigisaannik piviusulersaarutaavoq.