Kalaallit Københavnimiittut naapittarfittaarput

Sutorniartarfiup kalaallinut sulinngiffeqarlutik angalasunut Danmarkimilu najugaqartunut naapisimaarfiusinnaanissaa, pilersaarusiortuinit neriuutigineqarpoq.

Kalaallit imigassartaqanngitsumik naapisimaarfissaminnik iserfissaqarnissaat pingaartillugu sutorniartarfik ammarneqartoq, peqatigiiffiup siulittaasua Jakob Jeremiassen oqarpoq.

- Kalaallit naapeqatigiittarnissaat amigaataajuarami, pingaartumik ussiineq ajortut saaffissaaleqisaramik, taamaattumik taanna atorluarusukkaluaqaarput. Naatsorsuutigeqaarput kalaallit tivolimi katerisimaalerpata iluaqutaalaarsinnaassasoq, Jakob Jeremiassen oqarpoq.

Kalaallit Illuat kikkunnut tamanut ammavoq takornariaangaluarunik tamarmik isersinnaatitaallutik.

Peqatigiiffiup ilaasortai qaammammut ataasiarlutik kalaallinut napparsimallutik uninngasunut erinarsorlutik aliikkusersuiartortarput, taamaattumik aningaasat tuniniaanermit isertinneqartussat nipilersuutinut atorneqarnissaat pilersaarutaavoq.

Jens Ole Jerimiassen Danmarkimi najugaqartoq sutorniartarfiup ammarneqarnerani najuuppo, tassanilu kalaallinik allanik naapitsinissamut qilanaarpoq.

- Tassa nuannareqaara nerisinnaallutalu pigatta, neriuppungalu takkussuuttoqarluarumaartoq, Jens Ole Jerimiassen oqarpoq.