Kalaallit Københavnimi akerliuniarput
Poul-Erik Heilbuth-ip filmiliaa Billed-Bladet-p TV-Oscar-ianik akissarsitinneqartussatut innersuunneqarpoq. Ajugaassagunilu tallimanngorpat marsip ulluisa arfineq-aappaanni akissarsitinneqassaaq. Pisup nalerpiaani kalaallit Københavnimi Hotel D’angleterre-ip silataani akerliussutsiminnik takutitsinialerput.
Akerliussutsimik takutitsinissamik aaqqissuisut ilaat Sørine Gejl, Qassiarsummi namminersortuusoq, filmiliortunut apersugassat ilaannik ujarlertuusimasoq, oqarpoq, filmip takutinneqarnerani tusagassiortup kalaallit kulturiannik qanoq paasisimasaqanngitsiginera erseqqilluinnarsimasoq.
- Piviusuunngitsunik assitalersuinikkut pissusiviusut kukkusumik takutinneqarput. Taamaammat kalaallit pissusaat qanoq ittorpiaanersut takutinniarlugu nittarsaassiniarlutik, Sørine Gejl oqarpoq. DR-illi erseqqissartuarsinnarpaa katiterinermi pissusisviusunik allanngortiterisoqarsimanngitsoq.
Erinarsoqatigiit Aavaat erinarsortorineqassapput. Apeqqutinillu akiuisussatut Kalaallit Nunaanni ilisimatusartut arlallit peqataassapput. Kalaallit Danmarkimi isigineqarnerat alla takutinneqarusuppoq.
