Kalaallit København-imi kulturikkut unnusiornermi peqataassapput

Tallimanngornermi oktobarip 13-anni taarsippat Københavnimi unnuk kulturisiorfik aallartissaaq. Nunat avannaamiut kulturii immikkuullarissut malunnartinniarneqassapput: islandimiut nuannannerminni pinnguaataat, kalaallit uaaeertut savalimmiormiullu tasiorlutik nigalinngorlutik qiteriaasii takutinneqassapput.

Sumi tamaani nipilersortoqartussaavoq. Illorsuaq Atlantikumi savalimmiormiut nipilersortartut sisamat Spælimen-imik taaguutillit nipilersussapput. Angu Motzfeldt Kalaallit Illuutaanni Løvstrædemiittumi tusarnaartitsissaaq. Christiansborgimi Ulf Fleischer, Nanoq Jam, Aviâja Lumholdtilu kalaallit inaanni tusarnaatitsissapput. Savalimmiormiut inaanni savalimmiormiut erinarsoqatigiivi erinarsoqattaassapput. Qarlortartartoq Palle Mikkelborg Nunat avannarliit siunnersuisooqatigiiffianni tusarnaartitsissaaq.

Nerisassat kulturimut ilaammata nunani avannarlerni nerisassat nerisassioriaatsillu atorlugit Nunat avannarliit siunnersuisoqatigiit illuutaanni aamma sassaallertoqarniarpoq.

Nerisassalli tamani tamaani sassaalliutigineqarnianngillat. Nunatta savalimmiullu folketingimi ilaasortaatitaasa allaffeqarfiini siornatigut nerisassat mamarluinnartut sassaalliutaasarsimagaluartut ukioq manna kaagillertoqarlunilu kaffillertoqarniarpoq. Sooq taakku kisimik sassaalliutigineqarniarnersut paasiniaagatta ima akineqarpugut:

- Atlantikup avannaani suleqatigiit paasissutissiinissaq oqaloqatigiinnissarlu ukioq manna pingaartillugit aalajangernikuugatta taamaaliorniarpugut. Inuit mamartunik neritillutik paasissutissiinerput iluamik paaserpiarneq ajortarsimagaat paasinikuuarput, Atlatikup avannaani suleqatigiinneersoq Lotte Brøns Symes oqarpoq.

Atlantikup avannaani suleqatigiit oqariartuutaannik Høgni Hoydal saqqummiisuussaaq. Lars-Emil Johansen Kuupik Kleistilu ukioq manna Københavnimi unnummi kulturisiorfimmi peqataanianngillat.