Kalaallit isornartorsiorneqarnerat mamiatsaatigaa

Kalaallit ilaasortaatitaannik isornartorsiuineq aallartippoq Danmarkimi nunaserusullutik qinnuteqarsimasut itigartinneqarsimasulli, nunasiniartunut inissiisarfinniitiinnarneqartarnerannut akerliullutik Danmarkimi naalakkersuisunut illuatungiliuttut isumaqatigalugit kalaallit ilaasortaatitaat taaseqataanialermata.

Folketingimut ilaasortat taamatut tatisimaniarsarineqarnerat ingasappallaaqaaq. Isumaqarpunga Juliane Henningsenip qinigaaqqaartuulluni tatisimaniarneqaraluarluni isummaminik attassiinnarsinnaanera kusanartuusoq nersortariaqartorlu, Pia Christmas-Møller oqarpoq. Naalakkersuisoqatigiinniimmi oqaaserineqaqattaartut kusanaappallaaqaat, Ministeriunerullu naalakersuisut sinnerlugit naalakkersuisoqatigiinniit politikerit pissusilersornerannut isumaqataannginnini ippassaq naqissusermagu tamanna pisariaqarluinnartutut isigaara. Inatsisit tunngaviusut malillugit Kalaallit Nunaata folketingimi ilaasortaatitaasa qinersisinnaanertik allatulli ilaasortatut atorsinnaavaat, aamma Lars-Emil Johansenip oqaatigeriigaatut ilumoorpoq; qinerseqataagunik qinerseqataanngikkaluarunilluunniit sunneeqataasussaapput. Taamaammat folketingimi ilaasortaaqatitta kalaallit iliuusaat ataqqilluinnarpakka, Pia Christmas-Møller naggasiivoq.