Kalaallit imminnut arfattassinnerat norskit taperserpaat
- Alloriarneq eqqortuvoq, Norgemi arfanniartartoq Jan Bjørn Kristiansen - Norge-mi aalisartut aviisianni Fiskeren-imi apersorneqarluni taama oqarpoq.
- Kalaallit Nunaata arfattassami amerlassusissai nammineerluni aalajangermagit Norgemi pisortanit maluginiarneqartariaqaraluarpoq, Jan Bjørn Kristiansen oqarpoq.
Norge-mi arfanniartartut suliniaqatigiiffianni siulittaasoq Truls Soløy Norgemi arfanniartartunik ilaliivoq. Kalaallit Nunaata nammineerluni aalajangiinera ajunngitsuunerarpaa, tassami Norgemi arfanniartartut naatsorsuutigisimavaat, Kalaallit Nunaata piffissap ingerlanerani arfatassani nammineerluni aalajangerumaarai aamma amerliumaarai, arfanniarneq pillugu ataatsimiititaliarsuarmit IWC-mit itigartitaanerup kingorna.
Arferit pisarineqarsinnaanerannik isumaqatigiissut ukiunut tallimanut atuuttoq siorna 2012-mi atorunnaarpoq.
Isumaqatigiissutip atorunnaarneratigut nutaamik isumaqatigiissuteqarnissaq anguniarlugu isumaqatiginniartoqaraluarpoq, isumaqatiginniarnermi tassani Kalaallit Nunaata ukioq 2018-ip tungaanut arfattassani qulakkeertussaagaluarmagit.
Arfattassat amerlassusissai pillugit IWC-mik aasaq isumaqatigiinniartoqarmat isumaqatigiinniarneq iluatsinngilaq, arfanniarneq pillugu ataatsimiititaliarsuup isumaa malillugu Kalaallit Nunaanni innuttaasut piniariaasiat nunap inoqqaavisa ingerlatseriaasiattut naatsorsuutigineqarunnaarmat.
Piniarnermut Naalakkersuisoq Ane Hansen KNR-imut sapaatip akunnerani uani oqarpoq, Kalaallit Nunaat arfanniarneq pillugu ataatsimiititaliarsuarmit ilaasortaajunnaarnissamik siunertaqanngitsoq isertuunnaguli oqaatigalugulu Kalaallit Nunaat Arfanniarneq pillugu Ataatsimiitiliarsuarmik naammaginnilersoq.
