Kalaallit immiaaraliaat nunanit allanit soqutigineqarluartoq

Narsami immiorfeeraq Greenland Brewhouse ingerlalluarpoq.

Narsami immiaaraliaq nunanit assigiinngitsunit soqutigineqaqaaq. Korea, Japan, Rusland aamma USA soqutiginnittunut ilaapput, Greenland Brewhouse-imeersorlu Salik Hard tamanna nuannaarutigeqaa:

- Tusagassiortut nunanit allaneersut saaffiginnittarmata nuanneqaaq. Immiaaqqanik nioqquteqartartut aamma saaffiginnillattaapput, amerlangaarmatalu ataasiakkaat toqqarniarlugit aalajangerpugut, Salik Hard oqarpoq.

Narsami immiaaraliaq nunanit allanit soqutigineqarluarpoq, nunatsinnili qaqugu tuniniagaalissava?

Salik Hard ima akivoq:

- Immiaaqqat puiaasassaannut aalangersimasunut nunatsinni inatsiseqartoq tamatta immaqa nalunngilarput, tassa Nuuk Imeq-up puiaasaataata atorneqarnissaa inatsisitigut aalajangersagaammat. Kisianni Nuuk Imerlu maannakkut oqaloqatigiippugut, suleqatigiissinnaanerluta misissorniarlugu, Salik Hard oqarpoq.

Greenland Brewhouse immiaaraliornermut malinnaasinnaanerarput, Juullimulli immiaaraliaat tunisaalluangaarmat pisiniarfiit Danmarkimiittut nunguutsisoortarsimasut nalunaarutigineqarluni.

Immiorfeeqqap allineqarsinnaanera sillimmaffigigitsik Salik Hard aamma oqarpoq.