Kalaallit Illuutaata Christianiami sullissinini nukittorsaleraa
Københavnimi angerlarsimaffeqanngitsunut sullissisartut Hjemløseenheden, Københavnip kommuniata ataani inissisimasoq suleqatigalugu taamaaliortoqarpoq. Sullissisut marluk taakku KNR-imut taama oqarput.
Kalaallit amerlanerujartuinnartut, pingaartumik inuusuttut, Christianiamukartalersut, Københavnimi isumaginninnermik suliallit qaammatini kingullerni maluginiartalersimavaat.
Kalaallit Christianialiartartut ilumut amerliartornersut, kalaallilluunniit inuuniarnermikkut ajornartorsiutillit Københavnip ilaanit Christianialiartartut amerliartornersut sukumiinerusumik ilisimaneqanngilaq. Hjemløseenhedenip, isumaginninnermik suliallit marluk Kalaallit Københavnimi Illuutaaneersut tamanna ullut tamaasa Christianialiartarnikkut maanna misissussavaat:
- Annerusumik paasisimasaqalerniarluta taakungartalerpugut. Qassiunersut, sumillu pisariaqartitsinersut taava nalilertarparput, Peter Ellemann, Hjemløseenhedenip Københavnip kommuniata ataaniittup aqutsisuata KNR-imut oqaatigaa.
Aasaanera pissutaasimasinnaavoq, tassa Christianialiartartut amerlinerannut pissutaaqataasinnaalluni, Ellemann oqarpoq.
- Aggustiuvoq, imaassinnaavorlu sulinngiffeqarnerup nalaani Christianialiartut tassanilu festeriarlutik allatulluunniit, Peter Ellemann oqarpoq.
Kalaallit Københavnimi Illuutaat Hjemløseenhedenilu tamarmik immikkut kalaallinut Christianiamiittunut ornigullutik attaveqarlutillu qangali sullissisarput, maannalu tassa suleqatigiillutik orniguttalerniarput.
