Kalaallit illuliaat nunani avannarlerni killerni takutissavaat

Illussanik titartaasarfik Qarsoq ilaqutariit illussaat pillugit Namminersorlutik Oqartsusat illussanik titartaasartunik unammisitsineranni ukioq ajugaaqataavoq. Nutaarsiassaq Danmarkimut aamma siuaruaassimavoq maannalu illussanik titartaasarfik Qarsoq periarfissinneqarpoq titartakkaminik nunani avannarlerni killerni nittarsaassinissaminut.

- Savalimmiunukassaagut ilaqutariit illussaattut titartakkavut takutikkiartorlugit nunat avannarliit killiit ataatsimiilerpata juunip arfineq aappaani arfineq pingajuannilu, Qarsumi pisortaq Johan Rosbach KNRimut taama unnersiorpoq.

Nunat avannarliit killiit ataatsimiinnissaanni ilaqutariinneq sammineqartussaavoq inatsisartut nunatsinneersut, Islandimeersut Savalimmiuneersullu Torshavnimi ataatsimiilerpata. Qarsumeersullu titartagaat takutitsipput aataakkut ernuttallu imminnut qanillutik qanoq najugaqarsinnaanersut.

- Suliffeqarfitsinnut periarfissaq manna angisoorujuuvoq tassuuna periarfissinneqaratta suliatta nunani avannarlerni killerni nittarsaannissaannut, Johan Rosbach oqarpoq.

Illussanik titartaasartut unammisinneqarneranni ajugaasut pillugit nutaarsiassaq Danmarkimi nittartakkani assigiinngitsuni aamma saqqummiuneqarpoq taamaasillunilu Illussanik titartaasarfik Qarsoq Nuummi allaffeqartoq soqutigineqalersimavoq.

-Tamatuma kinguneranik naalagaaffiup ingerlataasa illutai nunatsinni iluarsaanneqassatillugit suliariumannittussarsiuussinermi attavigineqartalerpugut, Johan Rosbach tusagassiutini saqqumilaartinneqarnermi nassataasa ilaat pillugu taama oqarpoq.