Kalaallit Illuini juulleriartornera malunniuppoq

Odensemi Kalaallit Illuata juullimut niuffatsitsineq aqagu ammassavaa.

Ukiut qulit qaangiupput Kalaallit Illuat siullerpaamik juullimut niuffatsitsimmat. Taamani aallarniutigineqarput atuakkat kalaallisuut allaminnguillu.

- Ullumikkut kalaallit juullimut niuffatsitsisarnerat annertusisimaqaaq, Odensemiorpassuillu paasisimavaat paasisimavaat immikkuullarissunik pissanganartunillu juullimi tunissutissanik ujaasinermi Kalaallit Illuat alakkarneqarsinnaasoq, kulturilerinermik tusagassiisarnermillu suliaqartoq Annette Lyberth tusagassiuutinut allappoq.

Assassukkat eqqumiitsuliallu kalaallit pisiniarfianni tupersuarmilu kaajaluisamiittumi tuniniarneqassapput, erinarsoqatigiillu Umiaq kalaallit juullisiutaannik erinarsussallutik.

Ulloq taanna aamma Aalborgimi Kalaallit Illuanni juulllerpalaartitsisoqassaaq. Tassani erinarsoqatigiit Ikinngutit, Niviarsissat kiisalu Parnuuna aamma Walter tusarnaartitsissallutik. Juullip orpiliaa kaavinneqassaaq qarasaasiarlu atorlugu Skypekkut Qaqortumut juullimi inuulluaqqusisoqassalluni.

Aamma Københavnimi Kalaallit Illuat juullimut niuffatsitsinissamut piareersarpoq. Ukioq manna ulluni marlunni niuffatsitsisoqassaaq, siorna iluatsilluartumik niuffatsitsisoqareersorlu. Niuffatsitsineq decembarip pingajuani sisamaanilu ingerlanneqassaaq.

Naggataagullu Århus-imi Kalaallit Illuanni decembarip aqqarngani ualikkut juullerpalaartitsilluni glöggitortitsisoqarlunilu æbleskivetortitsisoqassaaq.