IA: Kalaallit Illersornissamut Qullersaqarfik ikiussavaat

Kalaallit Nunaanni Sakkutooqarfik piginnaanngorsaanermut, ilinniakkatigut suliffeqarnikkullu nunatsinni najugaqarfinni iluaqutaasinnaasoq Inuit Ataqatigiit isumaqarput, Illersornissaqarfiup Issittumi sulinermini nunatsinni innuttaasut peqataatinnerusinnaagai takorloorneqarluni:

- Sakkutooqarnikkut tunngaviusumik ilinniartitaanermi Kalaallit Nunaanni aallartinneqartussatut pilersaarutaasumi piginnaasatigut anguniagassaatitaasussani sammivigineqartariaqarput Kalaallit Nunaanni piginnaasatigut ujartorneqartut, assersuutigalugu Kalaallit Nunaanni Piumassutsimik Sakkutooqarneq, piffissarlu ungasinnerusoq eqqarsaatigalugu Kalaallit Nunaanni Sakkutooqarfimmi akissaateqarluni suliffeqarsinnaaneq tamannalu aqqutigalugu Kalaallit Nunaanni inuiaqatigiinnut tamakkiinerusumik iluaqutissiinissaq, Aaja Chemnitz Larsen oqarpoq.

Illersornissamut Qullersaqarfiup Issittoq pillugu nalunaarusiaa sivisuumik utaqqineqarsimasoq ukioq manna juunimi saqqummersinneqarpoq, kalaallit Illersornissamut Qullersaqarfiup suliaanut akuutinneqarnerunissaannik nalunaarusiami ilaatigut siunnersuutigineqarluni.

Illersornissaq pillugu Folketingimi isumaqatigiinniarnissat pisortatigoortumik aappaagu aallartissapput, 2018-imilu atuutilersinneqassalluni.