Kalaallit ilinniartuusimasut inaat katersugaasivimmi
Qanorpiaq isikkoqarnissaa pillugu, Aarhusimi katersugaasivimmit Den gamle By-mik taaneqartartumit tamanna siunnersuutiginiarneqarpoq. Taamaattumik sapaatip akunnerata tulliani inuiaqatigiinnik ilisimatusarsimasumit, kalaallit Københavnimi 70-ikkunni pissusaat pillugu paasiniaasussamik aallartitsilerput.
Danielle Guldmann Sekwati, kalaallit 70-ikkunni Københavnimi ilinniagaqarsimasut pillugit ilisimasaqarnerulerniarluni, sapaatip akunnerata tulliani pingasunngorpat Nuummut tikissaaq. Tamatuma kingorna Sisimiunukassaaq.
- Taamani kalaallit ilinniagaqartut qanoq inuuneqarnerat takutikkusupparput. Ilaatigut qallunaat illoqarfiisa oqaluttuassartaat aamma oqaluttuarineqartumi inuit oqaluttuassartaat ersersinniarlugit. Qallunaat illoqarfiisa allanngoriartornerat innuttaasunik aalajangersimasunik matumani kalaallinik immikkut sammisaqarnikkut takutikkusupparput, kisiannili amma inuit ataasiakkaat inuiaqatigiinnut sanilliullugit oqaluttuassartaat ersersikkusullugu.
Danielle Guldmann Sekwati oqarpoq. Taanna Danmarkimi kalaallinik ilinniagartunik arlalinnik oqaloqatereersimavoq taamaalillunilu ilinniartuunerup nalaani atugarineqartut pillugit ilisimasaqalaalereersimalluni.
- Inigitinneqartartut pequteqareertarput. Aammalumi ilinniartuugamik allaffeqarlutillu siniffiutigisumik nalaasaarfeqartarput. Kisiannili tassa ineeqqat pisariaqarnerpaaginnarnik pisataqartinneqartarput. Arlaqanngitsuinnaat ineeqqamiitinneqartarput. Pigisat ilaat ikittunnguit Kalaalit Nunaannersuupput, kisiannili atisat kamiit qaatiguullu saniasigut soqannginngajappoq.
Ilaasa ilaquttamik assingi arlaqanngitsut imaluunnit pinngortitami assilisat pigisarpaat.
- Amerlaqisut Kalaallit Nunaat ilaquttaminnut sanilliullugu maqaasinerusarpaat. Oqaloqatigisimasama akornanni Kalaallit Nunaannut angerlarserneq angisuumik atugaasarsimasoq paasivara, taanna oqarpoq.
Ineqariaaseq pillugu saqqummersitsinerup siunertaraa, kalaallit Danmarkimiittut pillugit sukumiinerusumik paasissutissiinissaq.
- Kalaallit Danmarkimiittut immikkut isiginiarneqakkajuttarput. Pilluarlutik inuusutut isiginiarneqanngikkaangamik isumaginninnikkut sumiginnagaasutut aamma isiginiarneqartarput. Taamaattumilluuna Danmarkimi kalaaliunerup pivusorsiornerusup takutinnissaa peqataaffiginiaripput, taanna oqarpoq.
Katersugaasivimmi, Den Gamle By-miittumi inissiaq sananeqartussaq, 1974-imi illoqarfiup immikkoortortaata inissiartaannut ilaavoq.
70-ikkunni Københavnimi aamma illit ilinniartuusimaguit, Danielle Guldmann Sekwati oqarasuaatikkut uunga sianerlutit attavigisinnaavat 41 85 07 61 imaluunniit qarasaasiakkut uunga allallutit: dgs@dengamleby.dk. Aammattaaq suliniut Facebookkikkut qupperneqarpoq taaguuteartumik Den Gamle By og Grønland.
