Kalaallit ilinniartut amerleriarput

Nunatta avataani ukioq manna ilinniartut ukiumut kingullermut sanilliutik amerlanerupput. Namminersornerullutik oqartussat kisitsisaatai nutaat Københavnimiittut naapertorlugit nunatta avataani ilinniartut atuartullu 413-pput, siornamut naleqqiullutik 32-nik amerlanerullutik.

Kisitsisit aamma takutippaat ilinniartut ilaasa ilinniarnissartik unitsittaraat. Ukioq kingulleq oktobarimi ilinniartut 451-upput, qaammatilli sisamat qaangiutiinnartut 413-iinnanngorsimapput. Kisitsisilli takutinngisaat tassaavoq ilinniartut juullip nalaani ilinniarnerminnik naammassinnissimanersut, soorluttaaq februaarimi ilinniartut nutaat aallartissimanerat takuneqarsinnaanngitsoq.

Ilinniartunit 413-iusunit februaarip aallaqqaataani 27-t Danmarkip avataani ilinniarput. Siornamut naleqqiullutik ikinnerulaarput, ukioq kingulleq 30-t missaanni Danmarkip avataani ilinniarmata, Namminersornerullutik Oqartussani siunnersorti, Hanne Søgaard taama ilisimatitsivoq.