Kalaallit ilinniagaqartut aningaasatigut ikiorserneqarsinnaanertik arajutsisarpaat
Taamaammat Danmarkimi Kalaallit Illuutaasa ilinniartut kaammattorpaat sutigut pisinnaatitaaffeqarnerlutik misissorluaqqullugu.
Kalaallit Danmarkimi ilinniagaqartut 2013-imi januaarip aallaqqaataa aallarnerfigalugu Danmarkimi ilinniarnermusianik SU-nik pissarsisalerput. Taamaakkaluartoq Namminersorlutik Oqartussat ilinniagaqartut aningaasartuutaannik arlariinnik suli matussusiisarput - immikkut ikiorsiissutinik taasanik. Danmarkimilu ilinniarnissamik qinnuteqarnermi amerlasuut tamanna arajutsisaraat, Aalborgimi Kalaallit Illuutaanni ataqatigiissaarisuullunilu ilinniartunik ilitsersuisoq, Signe Vinter Bach, oqaluttuarpoq.
- Kalaallit ilinniagaqartut Danmarkimi ilinniarusullutik paasigaangamikku assigiinngitsorpassuarnik qinnuteqaateqartussaasarput. Ilinniakkamut akuerineqarnissamik aamma Danmarkimi ilinniarnermusianik qinnuteqaateqartussaapput.
AAMMA ATUARUK Danmarkimi ilinnialersut amerliartortuarsinnarput
- Namminersorlutik Oqartussat aqqutigalugit aamma qinnuteqaateqartussaanertik puigortaraat arlaleriarluta naammattoortarparput - tamannalu Danmarkimi Kalaallit Illuutaat aqqutigalugit pisussaavoq, KNR-imut oqarpoq.
Pappiararsorneq pisariusoq
Kalaallit Nunaata Danmarkillu akornanni angalanissamut akiliutsinnissaq kalaallit ilinniagaqartut amerlasuut puigortarpaat.
– Ilinniariarlutik aallartussanngoraangamik arlaannit akiliunneqarnissartik aatsaat eqqaasarunarpaat. Taava uatsinnut attaveqartarput, qinnuteqaateqarnissamullu ingerlaaseq annertuvoq, pappilissallu amerlasuut uatsinnut nassiunneqartussaasarput.
- Taamaammat ilinniariartut ilaat ilinniariartorlutik angalanermut akiliunneqarnissartik erloqissutigisinnaasarpaat, Signe Vinter Bach.
Kigutit nakorsaat, tagiartuisartoq atuakkallu
Peqqinnissap tungaatigut aningaasartuutinut arlalinnut akiliutsittoqarsinnaanera aamma puigorneqartarpoq - soorlu assersuutigalugu kigutit nakorsaanit pilertortumik suliaritinnermut imaluunniit nakorsap innersuussineratigut tagiartuisartumit suliaritinnermut. Aammattaaq ilinniarnermut atatillugu atuakkanut aningaasartuutinut tapiiffigineqarsinnaaneq amerlasuut arajutsisarpaat.
Ikiorsiissutinilli pissarsissagaanni, ilinniartoq nammineerluni iliuuseqaqqaartariaqarpoq.
- Kalaallit Illuutaannut saaffiginnissapput. Tassaniipput ilinniartunik ilitsersuisartut ikiuulluarsinnaasut, Signe Vinter Bach oqarpoq.
