Kalaallit ikiortariallit Danmarkimiittut Martha Lund Olsenip ikiorniarpai
- Paasisakka imaannaanngitsorujussuupput, tassami Danmarkimut nuuttartut ilaat Nunatsinni inuuniarnermikkut ajornartorsiortutut oqaatigineqarsinnaanngikkaluartut Danmarkimut nuukkaagamik inuuniarnermikkut ajornartorsiornerulersarsimasut paasivakka.
Ilaqutariinnermut Inatsisinullu atuutsinermut Naalakkersuisoq, Martha Lund Olsen oqarpoq.
Københavnimi Aarhusimilu Kofoeds Skole-t KNR-imut oqaatigaat, kalaallit inuuniarnermikkut ajornartorsiortut Danmarkimut nuuttartut ukiuni kingullerni inuusussigaluttuinnartut takusalersimallugit. Tamannalu Ilaqutariinnermut Naalakkersuisup uppernarsivaa.
- Suu tassa taammaattoq paasitinneqarpunga, tamanna ilumoorpoq.
Tamannalu pillugu Naalakkersuisut qanoq iliuuseqalersaartut, Martha Lund Olsenip oqaatigalugu.
- Nunatsinni inuuniarnermikkut pitsaasumik inuuneqarsimagaluartut, Danmarkimut nuukkaagamik inuuniarnermikkut annertoorujussuarmik ajornartorsiuteqarlersartut paasitsinneqarpunga, ajornartorsiutaasartullu annertunerpaartaraat kalaallit nuuttartut ilaasa qallunaatut oqaasiinik atuisinnaanerat killeqartarmat. Taamaattumik Naalakkersuisunit aalajangerpungut tamanna pillugu paasisitsiniaanissarput, tassami danmarkimut nuuttartut ikilisartariaqarmata.
Martha Lund Olsenip oqaatigaa Naalakkersuisut paasissutissanik ilaatigut TV-kkut paasisitsinniaanernik ilaqartunik maanna pilersaaruteqalereersut.
- Naalakkersuisunit piareersaatit assigiinngitsut pilersaarutaapput, ilaatigut internetti atorlugu paasisitsisniaanissat. Aamma TV-kkut aallakaatitassiamik piviusulersaarummik sanatitsinissarput pilersaarutitta ilagaat, Martha Lund Olsen oqarpoq imalu nangilluni.
- Soorunami Danmarkimut nuukkusuttut inerterneqarsinnaanngillat. Kisianni paasineqartariaqarpoq Danmarkimut nuunnginnermi nuuffimmi pissutsit qanoq ittuunersut. Soorlu assersuutigalugu siusinaartumik suliunnaarnersiuteqaraanni taakku Danmarkimut nuunnermi annaaneqassapput. Aamma Danmarkimut nuunnermi suliffissarsiortutut nalunaarsorneqaqqaartariaqarpoq aningaasanik pisartagaqalissagaanni. ajoraluartumik Danmarkimut nuunnissaminnik aalajangertut amerlanerpaat isumaqartarput Danmarkimi inuuniarneq oqinnerujussuusoq. Kisianni tassa inuuniarnikkut ajornartorsioraanni inuuneq oqinnerulerneq ajorpoq.
Ilaqutariinnermut Inatsisinullu atuutsitsinermut Naalakkersuisoq, Martha Lund Olsen oqarpoq.
Københavnimi Kalaallit Illuat Løvstæde-miittoq pingasunngorpat ualikkut piumasunut aggersaavoq, tassani Naalakkersuisut isumaginninnermut tunngasunik suliaat pillugit, Ilaqutariinnermut Inatsisinullu atuutsitsinermut Naalakkersuisoq, Martha Lund Olsen oqalugiassaaq.
