Nunatsinni innuttaasugut siorna 2006-miit ukioq mannamut ikileriaateqarsimavugut, ukioq manna januaarip aallaqqaataanni 56.648-nngorsimalluta siorna januaarip aallaqqaataannut naleqqiulluta 253-nik ikinnerulersimalluta, Nunatsinni Naatsorsueqqissaartarfik taama nalunaaruteqarpoq.
Ikileriaateqarsimanerput Nunatta avataanut nussortut Nunatsinnut nussortunit amerlanerulersimanerannik pissuteqarpoq.
Siorna 2006-imi innuttaasut 644-t nunatta avataanut nuussimapput, nuuttut amerlanersaat, tassa 490-t meeraanngikkutik 15-it inorlugit ukiullit inersimasuupput 25-t 59-illu akornanni ukiullit.
Taava inersimasut 25-t 34-llu akornanni ukiullit ukiut qulit kingulliit ingerlaneranni pingasoriaammik ikileriarsimapput.
Taavalu meeqqiornikinnerulersimagatta meeqqat ukioqanngitsuniit qulingiluat tikillugit ukiullit aamma ikinnerulersimapput.