Kalaallit Holtemiunut ajorsarput
Kalaallit arnartai volleyball-ertartut Danmarkimi bronzennannikunut Holte-p holdiinut Københavnimi sungiusaatigalugu ippassaq unammigamik, kalaallit 0-3-mik ajorsarput, immikkoortuni pingasuni ima angusaqarsimallutik: 11-25, 19-25 og 24-26, aviisi Sermitsiaq taama allappoq. Volleyballertartut Lyngbymut 0-3-mik ataasinngormat aamma ajorsarput.
- Malunnaqaaq Lyngby-p unammisartuinut unamminermissulli ippassaq qeratatiginngitsut. Unamminerup immikkoortuisa pingajuanni siuarsimasaqattaarpugut, akeqqavullu assut tamaviaartillugit, kalaallit arnat volleyball-ertartut sungiusaasuat, Jens Graabæk, oqarpoq.
- Holtemut unamminitsinni isersimasut taarserartuarpakka, taamaakkaluartoq ingerlalluarpugut, pingaartumik serveraangatta.
Qeqqaniittut Julie Andersen Anna Sandgreenilu assut arsarluarput, sinaanili nakkutilliisut arsarluarpallaaratik, Jens Graabæk nangippoq.
Volleyballertartut ullumi freerput, ilimanarluinnarporlu Holtep Lyngbyllu volleyballertartui katitikkat sungiusaatigalugu aqagu unammissagaat. Tassa Kalaallit Nunaata holdip Danmarkip unammisartuinut arfininngorpat unamminnginnerani kingulliussagunartumik.
Kalaallit Nunaat Danmarkimut arfininngorpat unamissaaq. Unammineq taanna KNR-TV-kkut toqqaannartumik isiginnaarsinnaavat ulloqeqqata siorna nalunaaqutaq aqqanermut.
