Kalaallit Guatemalamut ajugaapput

Sungiusaasup Niels Møllerip inuusunnerusut aallaqqaataanit unammeqataanissaannut periarfississimavai, unammeqataasut ukiui agguaqatigiissillugit 23-upput.

Guatemalarmiut oqigisaangatsiarput, minutsit qulit ingerlanerinnaani kalaallit siuarput 8-5-rlutik, minutsillu 15-it ingerlanerinnaani 13-8-rlutik. Minutsit 20-t ingerlareersut 17-9-rput, kalaallillu siuariartuinnavillutik.

- Unamminermi tassani inuusunnerusut misilittagaqalersinnissaannut periarfissiinissarput atorluarparput, taamaalillutik nunanut allanut unammisartutut unamminerit unammeqataaffigisarnerat qanoq misinnartarnersut paasisaqarfiginiassammassuk. Pilersaarutigisatsitut unammineq tamaviat sukkasuumik ingerlavugut allamullu saannaveersaaqqissaarluta, Niels Møller oqarpoq.

Aamma nassuiaavoq minutsini 60-ini unamminermut tunniusimaqqissaarnissaq pingaaruteqartoq, kukkuallattoqarneranilu unammisat ajornannginaaralutik isertitsisarsinnaasimasut kiisalu namminneq isertitsinissaraluatik iluatsinngitsoortarsimallugit.

- Angusarli naammagisimaarpara, unammisartut aamma unammilluaqaat. Inuusunnerusunut una unammineq pingaarutilimmik misilittagaqalersitsivoq, sungiuasaasuat oqarpoq.

Nunatta unammisartui naggammik ullumikkut unammissapput, tamatumuuna USA-mut unammissagamik, tassani 5-nngorniutissapput. Unammineq nunatta nalunaaqutaa malillugu 17.00 aallartissaaq.

Akutaaneq Kreutzmann kalaallit akornanni amerlanerpaanik isertitsisuusimavoq, qulingiluanik isertitsisimagami.