Kalaallit EU-mit tapersersorneqarnerulissapput

EU-p siulittaasuata Barroso-p, Ilulissanut tikeraarnerani oqaloqatigiinnerit aalajangersaaffiunngikkaluartut, kalaallit isumaat apuunneqartut, Naalakkersuisut siulittaasuat Hans Enoksen oqarpoq:

- Pissarsiaqarnartorujussuuvoq, aamma uagut isummagut saqqummiunneqarmata, aammalu EU-mut ilaasortanut apuunneqartussanngormata. Aamma nalinginnaasumik, soorlu EU-p avataani isummersortarnermi nunat inoqqaavinut tunngatillugu piniakkanik atuineq, silaannaap allanngoriartornera, ilinniartitaaneq. Aamma Statsministeri Barroso-lu neriorsuimmata tapersersuiniarlutik, isumaqarpunga oqaloqatigiinnerit sunniuteqartumik maani ingerlanneqartut. Aamma arfanniartarnermut puisinniartarnermullu tunngasut eqqartorpagut, tassanilu Fogh Rasmussen-i neriorsuivoq Danmark-ip nunatsinnik illersuisarnera suli sakkortunerulissasoq. Aamma Barrosop nammineq isiminik takusani aallaavigalugit nunatsinnik illersuinissani neriorsuutigaa, tassa EU-mut paasitikkusuppaa, nunap inoqqaavi nungusaataanngitsumik piniartuusut, Naalakkersuisut siulittaasuat Hans Enoksen naggasiilluni taama oqarpoq