Kalaallit eqqumiitsuliortut arfinillit Art Copenhagenimi saqqummersitseqataapput
Ualeru ammaanersiornissamut angumersiniaalluni qimerluugassanut inigisassap piareernissaa ulluni kingullerni ulappugitineqarpoq. Eqqumiitsuliornermillu saqqummisersitsinermi kalaallit qimerluugassanut inigisaat annersaavoq. Suliniut Kalaallit Illuata Københavnimiittup aaqqissuussaraa, akiligassartaatalu aningaasaateqarfiup Augustinus Fondip akilertussaavaa. Taamaammat eqqumiitsuliortut peqataanissartik namminneq akilissanngilaat tunisaqassagunillu iluanaarutigiinnassallugu.
Nivi Christensen suliniuteqartut ilagaat, Kalaallit Illuanni sulinermi saniatigut ilisimatusarfimmi København Universititimi eqqumiitsuliornermik oqaluttuarisaaneq pillugu ilinniartuuvoq.
Arlaatigut nikeriartitsisinnaasut sunniuteqarsinnaasullu sammisimavagut. Taamaalilluni eqqumiitsuliortut marluk assigiinnik saqqummiussinatik assigiinngilluinnartunik saqqummiissapput. Taamaammat qimerluugassanut inigisatsinni qangaaniit pigisatsinnit aammalu nutaaliat misiligaanernit aallaavillit pigaavut. Tamakku saniatigut igalaaminernit narrarmillu eqqumiitsuliat pigalutigit. Eqqumiitsuliortut ataasiakkaaginnaat nittarsaannissaat kissaatiginngilarput kalaallilli eqqumiitsuliaannik nittarsaanissaq kissaatigaarput, taamaammallu kalaallit eqqumiitsuliaat amerlasuut pigaavut.
Eqqumiitsuliortut ilagaat Bolette Silis Høegh qimerluugassanut inigisassamut inuit assinginik nassarsimasoq.
Inunnik assilisat nassarsimavakka, aallaqqaataani eqqarsaatigisimagaluarpara aalisakkat pillugit qimerluugassiiniarlunga aalisagarpaasuaqartumik. Aalisakkanik qalipakkat qalipassimagaluarpakka taakkulu attuussarnaveeqqutinik angisuunik aappalungusersunik qassutinillu ilaqartussaagaluarlutik. Uangalu Sassuma Arnaajussaagaluarlunga, kisiannili taakku issuaaginnarpalaarpallaassasut eqqarsalerpunga. Kalaaliussuseralu taama saqqummersissallugu pisariaqanngimmat taava inunnik assilisat toqqarpakka.
Art Copenhagen sapaatip akunnerata naanera ilanngullugu ingerlanneqassaaq sapaammi naassalluni.
