Kalaallit danskillu naligiittariaqarput

Namminersorneq pillugu isumaqatigiinniarnerni pisortat pigisaannik niuernermik tunngaveqartunik suliffeqarfinnik ingerlatsisinnaanermut apeqqut ataaseq kiserluinnaat illuatungeriit assortuussutigaat. Taama allappoq Naalakkersuisut siulittaasuat Hans Enoksen.

Naalagaaffiup Kalaallit Nunaatalu aatsitassat pillugit isumaqatigiissutaanni naligiilluni agguaqatigiittarnissamut isumaqatigiissut atuuppoq, danskinillu siunnersuutigineqarpoq naligiinnissamut isumaqatigiissut Kalaallit Nunaat namminersulerpat atorunnaarsinneqassasoq. Danskit siunnersuutaat piviusunngussappat kalaallit uuliasioqatigiiffiani akileraaruseereernikkut sinneqartoorutit assigiimmik kalaallit nunaata namminersortup naalagaaffiullu avittalissavaat, paarlattuanilli danskit uuliasioqatigiiffiani DONG-imi sinneqartoorutit tamarmik Danmarkimut tuttassapput.

- Akuerisinnaanngilarput Kalaallit Nunaat Danmarkimit ajornerusumik pineqassappat. Siunnersuutaasoq ilalissagutsigu kalaallit nunaata uuliamit isertitaligassaasa amerlanersai Danmarkip pisalissavai. – Soorunami naatsorsuutigaara Naalagaaffeqatigiinni naligiinnissamik ataqqeqatigiinnissamillu tunngaviit isumaqatigiinniarnerit inaarsarnerini eqqaamaneqarumaartut, oqarpoq Naalakkersuisut siulittaasuat Hans Enoksen.